Ambargoyê serê Kampa Şehîd Rustem Cûdî (Mexmûr) 57 rojî yo ke yeno domnayene. Kampe de meseleyê cuyekî yenê ciwîyayene. Derheqê babete de Komîteya Weşîye ya Kampa Şehîd Rustem Cûdî (Mexmûr) eşkerayîyêk daye.

Eşkerayîya ke xeylî doktor û wezîfedarê weşîye tewrê ci bîyî de endama komîteye Dîmen Bîlen qisey kerd. Bîlene bale ante ambargoyo ke 17’ê Temmuze ra nata dewam keno ser û va: ‘‘Ambargoyî  cuya 12-13 hezar kesan ser o têsîrêko gird kerd. Nêweşê ke ganî bêrê berdene bi nêweşxaneyanê Hewlêrî bi zehmetîyanê girdan resenê bajarî, ya zî hetê asayîşî ra peyser yenê açarnayene. Di domanan zerrîya dadîyanê xo de cuya xo vînî kerde. Rîyê ambargoyî ra dermanê ke înan rê zaf hewcadarî esta bîyê kêmî.Coka ma zaf tengayî ancenê. Ma sey Komîtaya Weşîye Serekê Herêma Kurdistanî û heme cayanê eleqedaran ra wazenê ke wa ambargoyê serê Mexmûrî wedarê.‘‘