Newroza Amedî ewro qezaya Rezanî de Parka Newroze de yena fîrazkerdene. Şar seba Newroza Amedî ya ke bala her kesî ci ser o ya, hêdî hêdî verê xo dano meydanî. Meydan de platformêko pîl ronîya û pankartê bi nuşteyê sey ‘’Jin, Jiyan, Azadî’’ daliqîyayî.

Meydan de forografê Kemal Kurkuto ke Newroza 2017î de amebî qirkerdene, ameyî daliqnayene.

Amed de bi des hezaran kesî derbazê meydanê Newroze benê û coş her ke şino zêdîyeno. Posterê Rayber Apoyî meydan de yenê çarnayene.

Girseyî meydan de sloganê sey "Bê serok jiyan nabe", "Bijî Serok Apo" vanê û cinîyî zî bi kortejan û sloganê ‘’Jin, Jiyan, Azadî’’ meydanî dekenê.

Mayê Haştîye bi sloganê ‘’Bijî Newroz, Bijî aşitî’’ û bi çepikanê ciwanan dekewtî meydanî. Girseyî bi sloganan, bi coşî, bi dahol û zurnayan dekewenê meydanî. Girseyê ke resayî meydanî govende gênê.

Bernameyî saete 12.00 de bi rêzgirewtişî dest pêkerd.

Komîteya Amadekarîye ya Newroze ra Gulşene Ozer şehîdê Newroze yad kerdî û vat: ‘’Ma adirê Newroze seba azadîye û haştîye kenê we. Ma şexsê Abdullah Ocalanî de pêro tepişteyan selam kenê.’’