Dêrsim de amadekarîyanê bi rojan ra dima Newroze bi rayraşîyayîşêkî dest pêkerde. Girse bi rayraşîyayîşî kewt Meydanê Seyîd Rizayî. Wekîlê HDPyî yê Dêrsimî Alîcan Onlu, Wekîla Mûşî Gulîstane  Kiliç Koçyîgît, Şaredarê Dêrsimî Mehmet Fatîh maçoglu, Komeleya Elewîyan ê Demokratîkan (DAD) zî tede xeylêk temsîlkar û îdarekarê dezgeh, rêxistin û partîyan tewrê şayîye bîyî.

Şayîye de verî deqayêk rêz ame girewtene dima zî adirê Newroze ame tavistene. Verî Platformê Demokrasî û Kede yê Dêrsimî Yusuf Topçuyî qisey kerd û waşt ke pêro tepişteyê sîyasîyî bêrê veradayene.

Wekîle Gulîstane Kiliç Koçyîgît zî verî girse selam kerd û vat: ''AKPyî key dî ke ho îqtîdarî ra şino verê xo da şerî. Eke îtîfaqê îqtîdar û muxalefetî kurdan, elewîyan nêvînenê o çax nêeşkenê meseleyanê ma çareser bikerê.''

Wekîlê HDPyî yê Dêrsimî Alîcan Onluyî bi kirdkî qisey kerd û tepişteyî selam kerdî. Onluyî qiseykerdişê xo de wina vat: ''Vizêr senî ke Dehaqî gonîya şaran şimitêne ewro zî îqtîdarê AKP-MHPyî heman çi keno. Têkoşînê HDPyî têkoşînê Kawayî yo. Çareserîya meseleya kurdan mesajê Ocalanî yê Newroza 2013yî de nimite ya. Coka ganî tecrîd bêro wedaritene.Ma do pê ruhê Newroze ser bikewê.''

Qiseykerdişan ra dima hunermendî Derya Cengîz, Alî Baran û hunermendê herêmî vejîyayî sehne ser û girseyî govende girewte.