Qezaya Pirsûsî ya Riha de adirê Newroze bi coş û sloganan ame tavistene. Sere de Rêxistina HDPyî ya Riha, Mayê Haştîye û Wekîlê HDPyî xeylê rihayîjî tewrê şayîya Newroze bîyî. Warê Newroze de fotografê enîze poyraz û 33 qurbanê Qirkerdişê Pirsûsî ameyî akerdene.

Şayîye de Hemserekanê HDPyî ya Riha Ziya Çalişkan û Çîgdeme Karakeçîlî girîngîya Newroze ser qisey kerd û înan îlan kerd ke ê na Newroze dîyarîya Emîne Şenyaşar kenê. Dima Mayanê Haştîye adirê Newroze vist ta.

Wekîla HDPyî Ayşe Surucu şayîye de ard ziwan ke her ca de têkoşîn û xoverdayîşê kurdan berz benê. Surucuye vat: ''Hînî wextê ci ameyo ke berê Îmraliyî bêrê akerdene. Wext wextê azadîya Ocalanî yo.''

Wekîlê HDPyî Omer Ocalanî zî bale ante ser ke Pirsûs Kobanê ya û îfade kerd ke Keyeyê Şenyaşarî rûmetê şarê kurdî û Pirsûsî yo. Adara 2021î ra nata Birêz Ocalanî ra xebere nêna girewtene. Ganî tecrîd bêro wedaritene. Ma do yewîya xo awan bikerê û vera hêrişan cewab bidê.''

Qiseykerdişan ra dima hunermendî vejîyayî sehne ser û girseyî govende girewte.