Suleyma Îhtîyatogluyî verê Darbeya 12ê Êlule ra heta nika qala vurîyayîşê Newroze ANFyî rê kerde.

Îhtîyatogluyî pare kerd ke înan 12ê Êlule ra verî bi nimitkî Colemêrg de adir vistêne ta û vat: ''Înanê ke adirê Newroze tavistêne xo nimitêne.Dima cayanê stratejîkan de leşkerî ameyêne cakerdene. Şarî zî xo verda mîyanê şaristanî. Şarî kuçeyan de adir vistêne ta. Wexto ke polîs û leşkerî adir vînayêne ver bi adirî şîyêne. O çax zî cayanê cîyayan de adir ameyêne tavistene. Heta serê sinayî ma û leşkerî peyê yewbînan de bîyî. Têkoşîn û bedelan ra dima Newroze meydanan de ameye fîrazkerdene.

Verî ma mengêke verî kom bîyêne, mîyanê xo de karî vila kerdêne. A şewe ma xetê neqlê enerjî birnayêne. Bi nê hawayî adir şewe weş ameyêne dîyene. Şarî seba ke adirê azadîye bivisno ta, estbîyayîşê xo bimojno wina kerdêne. Çalakîya Mazlûm Doganî ra dima xora Newroze bîye serewedaritiş. Rixmê panzeran zî kurdan merkezanê şaristanan de Newroze fîraz kerde. Newrozan de bi desan kesî şehîd bîyî. Xêrê nê bedelan ra ewro Newroze bi beşdarîya mîlyonan yena fîrazkerdene. Newroza emserîne cara girîng a. Ma waran debikerê û waştişanê xo vajê.''