Exeter, Edinburgh û Viyana de Newroze bi coşî ameye fîrazkerdene.

Şaristanê Exeterî yê Brîtanya de bi şîarê ‘’Ma Rayberîye selam kenê, komelê demokratîkî awan kenê’’ Newroze ameye fîrazkerdene. Xeylê kesî tewrê şayîye bîyî. Şayîye de Koma Govendê ya Zarokan û hunermendî Merwan Şan, Memozan û Seyda Perînçek  vejîyayî sehne ser. 

Paytextê Skoçya Edinburgh de Merkezê Komelê Demokratîkî yê Kurdan de şayîye ameye viraştene. Şayîye de Osman Baydemîrî bale ante girîngîya yewîya neteweyîye ser û hunermendî Barham Shemamy û Koma Renge Welat vejîyayî sehne ser.

Paytextê Avusturya Viyana de bi hezaran kesî tewrê şayîye bîyî û înan bi sloganan azadîya Rayber Apoyî waşte. Hemsereka KCDK-E Zubeyde Zumrut şayîye de vat ke ê paştî danê vengdayîşê Rayber Apoyî. Şayîye de hunermend Sîmar, Azad Bedran, Îbo Qamişlo, Koma Dewran, Hozan Ariana, Alî Jiyan û Alî Gavarîn vejîyayî sehne ser.

Şaristanê Grazî yê Avusturya de zî Newroze ameye fîrazkerdene. Şayîye de tim sloganê sey ‘’Bijî Serok Apo’’, ‘’Jin, Jiyan, Azadî’’, ‘’Bijî Newroz’’ ameyî vatene.

Ancî şaristananê Innsbruck, Lautrach û Tiorî yê Avusturya de zî Newroze bi coşî ameye fîrazkerdene.