Mabênê serranê 2014-2015î de DAÎŞî hêrişê Şingalî kerdbi û gerîlayanê HPG û YJA-Starî, şerwananê YJŞ-YBŞyî Şingal pawitbi. Dadîyanê Şingalî zî paştî dabi hêzanê gerîla û şerwanan. Nînan ra yew zî dayîke Nûrê Şengal a.

Endama Meclîsê Şarî yê Xanêsorî Nûrê Şengal bi wesîleya serrgêra 6. ya DAÎŞî ra xelisnayîşê Şingalî ANFyî rê qisey kerd.

Nûrê Şengal wina qala ê rojan kerde: ''Wexto ke DAÎŞî hêriş kerd ma xîret kerd ke biremê Başûrê Kurdîstanî. Ma kampanê Başûrî de mendî. Mêrdeyê mi nêeşka vindero û agêra şi şer kerd. Dima ke rayîr abi ez zî pa domananê xo şîya Şingalî. O çax şerî hema zî dewam kerdêne. Gerîlayan semedê ma xeymêke akerde û hetkarîya ma kerde. Wexto ke ma ê şinasnayî rayîro raştikên şinasna. Bi nê hawayî ma fikrê Rayber Apoyî şinasna.

Hetêkî ra gerîlayan şer kerdêne hetêkî ra zî ma nan amade kerdêne. Şer giran bibi la şerwanî bimoral bîyî. Ma af kêfweş bîyî. Ma vatêne şerwanî semedê ma ganê xo danê, destê ma ra çi yeno ma do semedê înan bikerê. Verî ma tersayêne la gerîlayan tersê ma çin kerd. Ma sey dadîyan bire daye ke xo ver bidê û dest bierzê çeke. Kênaya mi zî o çax tewra YBŞyî bîye. Wexto ke Şingal ame azadkerdene ma koy de bîyî. Gerîlayî ameyî ma het û ma rê vat ke Şingal azad bîyo. Ma zaf kêfweş bîyî, ma şayîye kerde.

Ez venga pêro êzidîyan dana ke wa abigêrê Şingalî. Erdê ma her cayî ra rindêr o û ma do heta peynî wayîrê erdê xo vejîyê ke gonîya şehîdanê ma tede rijîyaya. Erdê ma dima ke ame azadkerdene ma Îdareyo Xoser naro. Ma meclîs û dezgehê xo awan kerdî. Ez zî tewra karanê meclîsî bîya.''