Endamê Dîwanê Kongreya Komelê Demokratîkî (KCD) Mehmet Nurî Ozdemîrî derheqê tecrîdê vera Rayberê Şarê Kurdî Abdullah Ocalanî û babetan de ANFyî reyde qisey kerd.

Qiseykerdişê Ozdemîrî ra beşêk wina yo:

''Wexto ke merdim ewnîyeno, aqil, pêşnîyazî û perspektîfê ke seba çareserkerdişê meseleyan Îmrali ra vejîyenê vîneno ke Birêz Ocalan ti,m rayîrêkê bînî pêşkêş keno. Birêz Ocalan Tirkîya de Kurdîstan de û Rojhelatê Mîyanênî de adresê çareserkerdişê meseleyan û krîzan o.

Verê ma de tabloyêko xirab esto. Rewşa Sûrîye werte de ya. Nika zî qala darbe yena kerdene.  Tirkîya hewceyê aqilêkê polîtîkî ya. Birêz Ocalan hem sey lîderêkê sîyasîyî hem zî sey entelektuelêkî peşnîyazê seba krîzî kerdî û tesîrê ci yê cidîyî beşanê komelî ser de yenê dîyene. Coka dewamkerdişê tecrîdî fayde nêdano kesêkî. Na noqta de Birêz Ocalanî behsê aqilê dewlete kerdbi û no aqil ge ge wextê krîzan de tewrê kayî beno. Ganî no aqil nê tecrîd wedaro.

Tirkîya de semedê pêro meseleyan meseleya kurdan o. Heta ke meseleya kurdan çareser nêba krîzê demokrasîyî, rejîmî, ekonomîkî zî çare nêbenê. 

Ma rewşa nikayêne ya Tirkîya zî sey tecrîd name kenê. Kesêk nêeşkeno sewbîna kesan de bêro têhet û  eşkerayîya çapemenîye bido. No heqo unîversal o. Naye ra ma vanê na rewşa ke ê nêeşkenê îdare bikerê , rewşêka bêsîyasetbîyayîşî ya. Tecrîdo ke Îmrali de dest pêkerd pêro welat de bi hawayêkê sîstematîkî yeno kerdene. Ma pê bawer ê ke no tecrîd bi akerdişê beranê Îmraliyî do bêrê şikitene.