Konseya Muhamekerdişî ya Berze ya Iraqî bire dabî ke Partîya Demokrasîyî û Azadîye ya Êzidîyan (PADÊ), Tevgera Azadîye û Partîya Cepheyê Têkoşînê Demokratîkî wa bêrê qefilnayene.

Polîtburoyê PADÊ qezaya Sinûnî ya Şingalî de derheqê babete de eşkerayîyêke daye û waşt ke wa bira qefilnayîşî bêra betalkerdene.

Temsîlkarê Silêmanî yê PADÊ û Endamê Polîtburoyî Silêman Haciyî eşkerayîye wende. Haciyî da zanayene ke PADÊ 2017 de goreyê qanûnanê Iraqî ronîyaya û hîrê reyî zî tewra weçînayîşan bîya. 

Haciyî bale ante ser ke na bire zîyaretê Bexdadî yê Erdoganî ra dima dîyaya coka tede tesîrê Erdoganî est o.Haciyî vist vîrî ke bire serrgêra Fermanê 3yê Tebaxa 2014î de ameya dayene û no tewir rexne kerd.

Haciyî pare kerd ke na bire ra verî ganî tehqîqatêko huqûqî biameyêne kerdene û vat: ''Partîya ma çi sebebî ra qefilîyena? Ma seba fînansmanê partîya xo qurişêk zî nêgirewt. Teberê welatî ra şarê ma ardimê ma kerd.

Seba betalkerdişê na bire ma do bixebitê. Ma do pêro delîl û belgeyan pêşkêşê mehkeme bikerê. Wa her kes bizano ke partîya ma seba çewî tehdîtêk nîya.''