Koordînasyonê PAJKî bi wesîleya serrgêra 43. ya ronayîşê PKKyî eşkerayîyêke daye.

Eşkerayîye wina ya:

''Netîceya tay wendekaranê Anqara de serkêşîya Rayber Apoyî de 5 serran dima dewa Fîsî ya qezaya Licê ya Amedî de 27ê teşrîna peyêne ya 1978î de PKKyî kongreya xo ya verêne kerde û bi hawayêkê resmî ronîya. No ronayîşê partîyêke ra wetêr yew hemleya azadîye bibî ke verê xo dabi azadî û xoverdayîşê bindestan. Na taybetmendîya PKKyî kerd ke PKKyî tarîx de verê xo bido azadîya cinîyanê ke beşo tewr bindest ê komelî bi. Rayber Apoyî ronayîşê PKKyî sey 'Terzo newe yê cuye, meseleya rûmete, çalakîyêka namusî ya ke wayîra manaya komelkî ya.' pênase kerd. Seba ke  çimeyê xo têkoşînê şaranê Rojhelatê Mîyanênî û Kurdîstanî ra girewt PKK sey têgêrayîşê merdimîye, têgêrayîşê cinîyan, têgêrayîşê kede, têgêrayîşê komel û merdiman ê azadan pênase bi.

Rayraşîyayîşê PKKyî yo ke qîreyo pîl ê ciwananê Kurdîstanî bi, destpêkî ra heta peynî bi vayê azadîye, sînorê xo ra derbaz bi, tesîrê pêro Kurdîstanî kerd, vengê xo pê şarê kurdî da eşnawitene, zerrîya şarî de ca girewt û bi têgêrayîşêkê şarî. Dima ke Paradîgmaya Ekolojîk, Demokratîke û Azadîgîra Cinîyan ameye averberdene PKK bi tek vengo raştikên ê şarê Kurdîstanî.

Têkoşînê azadîye yê bi rayberîya PKKyî pê bedelanê pîlan, pê wayîrê nê bedelan artêşa şehîdan wina şer kerd ke eşkeno rayberîya cuya azade ya merdiman bikero, hende xo ver da û erjî afernayî. Raştîya şehîdan a PKKyî hem sebeb hem zî garantîyê cuya azade ya şarê Kurdîstanî yo. Xeta nê şehîdan ra rayraşîyayîş tek metodê cuya rûmetêne yo. Hetê bînî ra eşkera yo ke partîya ke hende şehîdî dayê do bin nêkewa. Têkoşîno ke Hakî, Mazlûm, Sara, Zîlane, Agît, Rustem, Şîlane, Sîmko, Vîyane, Gelhat, Arîne, Delale, Hilmet, Kasim, Haware û Esmeran rayberîya ci kerde serfîrazîye ra ber qet yew rayîrê nê têkoşînî çin o.

PKKyî pê xeta azadîya cinîyan kêmasîya têgêrayîşanê sosyalîstan kerde temam, rayberîya înan kerde. Xeta azadîya cinîyan pê keda bêhempa ya Rayber Apoyî qewimîyayîşê tarîxî mojnayî û resaye ewro. Serkewtişê PKKyî israrê têkoşînî, eşkerakerdişê hêzê ferdan û xonewekerdişî ra sebeb qewimîya.

Nê newekerdişan ra oyo tewr radîkal û tewr bitesîr gamê seba azadîya cinîyan ê. Meseleya azadîya cinîyan ale sey nakokîya kurdan pênase bena, ronayîşê ci ra dima merkezê PKKyî de ca girewt. Azadîya cinîyan hucreyê kokî yê PKKyî yo. Serrê têkoşînê bêemanî, teorîya camêrdan ra dûrbîyayîşî û îdeolojîya xelisîyayîşê cinîyan mîyanê PKKyî de formule bîyî û her yew formul bi destpêkê dewrê cuya azade. Pê nê dînamîl û hêzê fîzîkî YJWK ronîya, dima YAJK ronîya û xoverdayîşê azadîya cinîyan ê kurdan vejîya werte. Peynî de cinîyî binê nameyê PAJKî de bîyî partîye û înan kerd ke rayberîya azadîya pêro komelî bikerê.

Ewro PKK tek nasnameyo meşrû, demokratîk û azad ê kurdan o. PKK seba ke şarê kurdî şaranê Rojhelatê Mîyanênî reyde serê esasê krîteranê demokratîkan de biciwîyo tek metod o. PKK yew têgêrayîşê ciwanan ê pêro wextan o. PKK cesaretê serewedaritişî yê vera zaliman, vengê heqîqatî yo û bi xo o heqîqat o.

PKK pêro dinya û Rojhelatê Mîyanênî de averberdişê têkoşînê neteweya demokratîke de rolêko rayber ard ca. Xeta Hîrêyîna ke ewro fekê pêro şaranê Rojhelatê Mîyanênî de ya, erjan û xoverdayîşê PKKyî yê vera pêro hêrişanê qirker-faşîstan ê dewleta tirke û hegemonan îfade kena. PKK pê xeta xo ya fikr, eql û azadîya cinîyan, pê sîstemê xo yê rêxistinîye tesîr û rayberîya pêro rêxistinan û têgêrayîşanê sosyalîstan, çepgîran, ekolojîkan keno. Serra 44. ya ronayîşê xo de PKK her wextî ra zêdêr nêzdîyê azadîya cinîyan, neteweya demokratîke û komelê azadî yê Kurdîstan û Rojhelatê Mîyanênî yo.

AKP-MHP îqtîdarêko qirker, faşîst û dişmenê erjanê komelî yo û temsîlkarîya modernîteya kapîtalîste û hegemonya keno. No îqtîdaro faşîst herême de beno çete, mafya û vurîyeno nêweşîyêka janî. PKKyî wextê tewr bihêzêrî yê nê îqtîdarî de xoverdayîş kerd esas û têkoşînî ra xo dûrî nêgirewt.

Bi taybetî têkoşînê 7 mengan o ke gerîlayanê HPG û YJA-Starî rayberîya ci kenê milê AKP-MHPyî şikit. Derbê YJA-Starî yê vera artêşa faşîste ê felç kerdî. Na westatîye prosesêko bêhempa vet werte. Xoverdayîşê gerîlayan ê vera çeka kîmyewîye, teknîk û hêrişanê dişmenî nika ra tarîxê şarê Kurdîstanî de cayê xo yo rûmetên girewt. No têkoşînê gerîlayan Hemleya 'Wextê Azadîye' bene lewe û nêzdîyê serfîrazîye keno. Netîceya çalakîyanê gerîlayan nêzdî de do warê komelkî û sîyasî de zî serfîrazîye qetî bikera.

AKP-MHPyo ke îqtîdaro tewr faşîst, sextekar, bêexlaq û serdestîya camêrdan ê tarîxê Tirkîya yo, kewt prosesê rijîyayîşî. AKP-MHP nê prosesî de PDK zî anceno xo het û pê PDKyî vera PKKyî şer keno. PDK netîceya na hemkarîya gemarine de hîna zaf bêîtîbar bîyo û çimê şarê Kurdîstanî de teşhîr bîyo. Serra 44. ya têkoşînê PKKyî de no îqtîdar do bêro rijnayene û bierzîyo çopê tarîxî. Bi heman hawayî kesê ke hemkarîya nê rejîmî kenê zî do bêrê binvistene.

Serfîrazîya ke artêşa ma ya şehîdan, destananê çêrîye û serranê dergan ê têkoşînî rê do şêra, do biba eserê rayberî û hêzê kolektîfî yê cinîyan. Ma do cinî, doman, tarîx û erjanê xo meverdê destanê nê sîstemê serdestîya camêrdan. Ma pê şîarê 'Vera qirkerdişê cinîyan wext wextê pawitişê komel û cinîya azade yo' do qesasê pêro cinîyan bigêrê, çalakîyanê xo xeta azadîya cinîyan de bizêdînê û serra 44. ya têkoşînî de ser bikewê.

Pê na bawerîye sere de ê Rayberê Apoyî ma serrgêra 43. ya ronayîşê PKKyî ya pêro şarê xo, cinîyan û embazanê xo fîraz kenê. Ma venga pêro cinîyanê dinya û Kurdîstanî danê ke pê pêro hêzê xo tewrê hemleya rijnayîşê sîstemanê serdestan bibê, sere wedarnê û ser bikewê. Ma venga şarê xo yê welatperwerî danê ke şexsê welatperwerê pîlî Yusif Guloyî de wayîrê erjanê xo vejîyo, pîl bikero, dormeyê erjanê PKKyî de bêro pêser û vera rejîmanê qirkeran têbigêro. Ma venga pêro ciwanan danê ke tewrê PKKyî bibê û derban bidê zaliman ro. Ma venga pêro beşanê komelî danê ke wayîrê xoverdayîşê bi rayberîya cinîyan vejîyê, seba ke xeyalê şehîdan bîyarê ca tewrê xoverdayîşî bibê, cuya azade awan bikerê û dewrê homayanê cinîyan ê modernan biciwîyê.''