Parko ke nameyê ci hetê qeyûmê Şaredarîya Dêrike ra sey Parkê Sûltan Kosenî amebi vurnayene, dimayo ke şaredarîye kewte destê HDP’yî parkî rê reyna nameyê Ûgûr Kaymazî dîya. Hemserekan vat, “Ma do ercanê şarê xo rê wayîr vejîyê.”
Hetê şaredarîya Dêrike ya Mêrdînî ra 26’ê Gulane 2006 de qezaya Qoserî de parkêk bi nameyê Ûgûr Kaymazî yê 12 serrî yo ke pîya bi pîyê xo 21’ê Teşrîna Peyêne 2004 de hetê polîsan ra ame kiştene ame akerdene. Dimayo ke bi qerarê Wezaretê Karanê Zereyî qeyûm ame tayînkerdene hetê îdareyê qeyûmî ra nameyê parkî amebi vurnayene û nameyê kesê tewr dergi yê dinya yo Dêrikij Sûltan Kosenî dîyabi ci.
Bi weçînitişanê 31’ê Adare yê cayîyan Partîya Şaran a Demokratîke (HDP) şaredarîye qezenc kerde û bi pêşnîyarîya Meclîse Şaredarîye yê Dêrike rixmê rayanê “redan” ê AKP’yijan de bi raya zafaneye nameyê Ûgûr Kaymazî reyna ame dayene bi parkî. Şaredarîye qerarê vurnayîşê nameyî resna Qeymeqamîye û yeno pawitene ke rojanê nizdan de parkî rê ancî tabelaya “Parkê Cuye yê Ûgûr Kaymazî” bêro daliqnayene.
Hemserekanê HDP’yijan derheqê newe ra namekerdişê parkî de qisey kerd û ard ziwan ke bi waştişê şarî înan qerar dayo ke nameyê parkî ancî bikerê Ûgûr Kaymaz. Hemserekan vat ê wazenê texrîbato ke qeyûman xo ra dima verdayo biqedînê û qeraranê şaredarîye de goş bidê waştişanê şarî.
