Iraqî de xebatê weçînayîşî dewam kenê. Kurdistanijî zî xo amade kenê ke pîya bi lîsteyêke tewrê weçîneyaşî bibê. Hemserekê lîsteya îtîfaqê Kurdîstanîyî Abdurehman Mistefayî derheqê weçînayîşî de ANFyî reyde qisey kerd.

Mistefayî îfade kerd ke lîsteya îtîfaqê Kurdîstanîyî de 32 partî û dezgehî estê û vat: "Partîyanê Kurdîstanîyan ra ber partîyêka ereban û çar partîyê tirkmenan zî estê. Heta nika xebatê ma yê serkewteyî bîyî. Seba ke partîyê Kurdîstanîyî nika pîya lîsteyêke de yê batalkerdişê rayan o ke verê cû ame meydan, nê weçînayîşî de do nêbo. Weçînayîşê verênî de her partîye bi lîsteyêka cîyaye tewr bîyêne. Seba ke partîyî yewbînan ra vila bîyêne  zaf rayê kurdan batal bîyêne. Labelê nika partîyê Kurdîstanîyî bi lîsteyêka hempare tewrê weçînayîşî benê, coka rayê ma zî do batal nêbê. No têna seba ma kurdan do bibo serkewtişêko pîl. Ma do na reye parlamentoyî de bibê wayîrê kursuyan û bi nê hewayî hîna zêdêr xizmetê şarê xo bikê."