15ê temmuze ra nata şarê Ehwazî vera sîyasetê bêawverdayîşî û krîzê ekonomîkî yê rejîmê Îranî vejîyeno meydanan û nawnayîşanê pîlan keno. Nê nawnayîşî Rojhelatê Kurdîstanî û Îran de zî dewam kenê. Heta nika nê nawnayîşan de 8 çalakîkerî kişîyayî û xeylêk kesî birîndar bîyî.

Endama Koordînasyonê Komelgehê Cinîyan ê Azadan ê Rojhelatê Kurdîstanî (KJAR) Peymane Vîyan derheqê rewşa nawnayîşan de ANFyî rê qisey kerd. Qiseykerdişê Vîyane ra beşêk wina yo:

''10 rojî yo şarê herême seba awe û heqê cuye meydanan de yo. Rejîmê Îranî xîret keno ke pê qirkerdian vengê şarî bibirno.  42 serrî yo rejîmê Îranî pê qirkerdiş, asîmîlasyon, îşkence û şîdetî cewabê waştişanê şarî dano. Şarê kurd, ereb û belûçan qurbanê nê sîstemî yê. Mîyanê hende zengînîya erdê xo de nê şarî kolberî kenê, feqîrîye ra mirenê. 42 serrî yo rejîmê Îranî dizdîye, bêusûlîye keno. La her ke şino nêrazîbîyayîşê şarî zêdîyeno. 2017 ra nata şar pê metodanê radîkala sere wedarneno. Şar wazeno rejîmê Îranî binî ra bêro rijnayene. Nawnayîşanê 2018î de rejîmî bi desan ciwanê çalakîkerî qetil kerdbî.  Coka hînî sebrê şarî nêmendo. Rejîmî awa çemê Karûnî ziwa kerde, her roje ciwanan îdam keno. 

Seke ma wextê weçînayîşan de zî vat Îran de şarî heqanê xo eşkenê kuçeyan de bigêrê sindoqan de nê. Îbrahîm Reîsîyî zî mesaj dabi ke şarê Îranî qirkerdişî reyde têrî yê. Dejê kurdan, ereban, belûçan yew o, dejê şaran ê bindestan ê Îranî yew o. Tek rayîrê xelisîyayîşê şaran zî paştdayîş o.

Bêguman tîya de rolê cinî û ciwanan zaf girîng o. Cinî û ciwanî ganî rayberîya komelî bikerê, vengê şarî bizêdînê. Ganî şar waştişê xo bikero yew û nê sîstemê rejîmî qebul nêkero. Waştişê şaran xeta ke sîstemî red kena û îradeyê şaran temsîl kena, yena manaya xeta hîrêyîne. Şarê Îranî nika semedê na xete têkoşîn kenê û bedelan danê.''