25ê êlula 2021î de Xelîfan de dafika PDKyî de 5 gerîlayî şehîd bibîy. Hêzanê PDKyî cenazayî nêdabî. Coka Meclîsê Şehîdan ê Herêma Cizîre seba ke cenazayan bigêrê verê Berê Sînorî yê Sêmalka de dest pê çalakîye kerdbî. 

Mayê Haştîye yê Rojawanî zî tim tewrê çalakîye benê. Mayan roja 7., roja 16. û roja 61. ya çalakîye de waşt ke mektûbe bidê selahîyetdaran la tim ameyî astengkerdene.

Mayanê Haştîye Şemsîxane Gulo û Suade Mistefa ke 4ê kanûna 2021î de waşt ke mektube bidê selahîyetdaran ANFyî rê qisey kerd.

Dayîke Şemsîxane Gulo vat: ''Ma waşt sey dadîyan mektube bidê. La heta nika cewab nêdîya ma. Çira cenazayan nêdanê? Ma rê vanê ke cenazayî Başûr de nîyê. Eke eşkenê ney îsbat bikerê wa bikerê. Ma eşkenê îsbat bikerê ke cenazayî Başûr de yê. Kurdîstan yew parçe yo û kurdî way û birayê yewbînan ê. Wa waştişê Mayanê Haştîye bêrê caardene. Key ma şinê cayê înan pêşmergeyî pê telefonanê xo bilîyenê dima zî vanê mesayîyê înan qedîyayo. 

Ez venga pêro way û birayanê ma yê Başûrî dana ke wa cenazayan bidê. Wa keyeyî cenazayî defin bikerê ke rehet bibê. Dişmen hêrişê pêro kurdan keno. Ganî şarê Başûrî zî vera ney wurzo we û vengê xo berz bikero. Kulturê ma yê xoverdayîşî zîndanan de dest pêkerd û pê fikr û felsefeya Ocalanî dewam keno.''

Dadîya Hevrîne Xelef Suade Mistefa zî ard ziwan ke ê seba ke cenazayanê xo bigêrê wazenê selahîyetdaran de pêvînayîşî bikerê û vat: ''Ma seba şehîdanê Xelîfanî tîya de yê. 3 reyî ma şîyî sînorî û cenazayî waştî. Wa cenazayê şehîdanê ma bidîyê ke ma defin bikerê. Labelê cewab nêdîyeno ma. 2 mengî yo ma tîya de çalakîye kenê. Şar payan ser de yo. Ma pêro dadîyê şehîdan ê. ma têna wazenê selahîyetdarî cenazayan bidê. Heta nika çewî goş nêda waştişanê ma.''