Rojnameger Dogan Amedo ke herêma Behdînanî ya Başûrê Kurdîstanî de yo û çimdarîya hêrişanê neweyanê dewleta tirke keno derheqê rewşa herême de ajansê ma rê qisey kerd. Qiseykerdişê Amedî ra qismêk wina yo:

''Prosesê peyênî de selahîyetdarê payeberzî yê PDKyî  Erdogan reyde pêvînayîşanê muhîman kenê.  Sebebê înan o verên PDK hetê ekonomî ra pabesteyê dewleta tirke yo. No zî rîyê menfeatê keyeyê Barzanîyî ra yo. Çunkê mulkê barzanîyan ê bi mîlyon dolaran destê dewleta tirke de yo. Erdogan nê kartî vera Barzanîyan zaf hole şuxulneno û wazeno pêkerdişanê nêfermîyan bîyarê ca. Ê diyînî zî pabesteyîya sîyasîye ya. Başur de şar vera PDKyî dekerde yo. Şar tengayî anceno û vera nê çalakîyan keno. PDK keno ke pê destê dewleta tirke şarî bîgêro binê kontrolî.

Nê pêvînayîşanê peyênan de Barzanîyî bitaybetî wazenê wa dewleta tirke şiro Iraqî ser ke Pêkerdişê Şingalî bêro caardene. Wazenê ke wa Şingal reyna raştê fermanî bêro. Nê pêvînayîşan de rolê PDKyî yê şerê leymînî yê dewleta tirke yê vera PKKyî yeno destgirewtene. Goreyê tay çimeyan pêvînayîşan de PDKyî ra ameyo waştene ke emser vera gerîlayan dahîna aktîf têbigêro û wird hetan zî kerdo pê sare. Reyna pêvînayîşan bi îdarekaranê Iraqî de zî blokê sunîyan ra semedê operasyonê dewleta tirke hetkarî wazîyena. Ameyo waştene ke wa pê destê artêşa Iraqî sere de Şingal û Mexmûr wa tay cayan de tay gamî bêrê eştene.

Nika Behdînan de têgêrayîşê hezanê PDKyî zafêr bîyo. Waranê Metîna û Heftanînî rê pê wesayîtanê zirxinan û hêzanê taybetan ê leşkeran takvîye yeno kerdene. PDK par vera gerîlayan dest pê şerî kerd bû bi sebebê wird qewimîyayîşanê Xelîfanî. Senî ke yeno vînayene emser û dahîna zelal hêriş bikerê. Biyabetî çend aşmanê peyênan de hêzanê PDKyî xeylêk cayan de damî nayî ro. Seba ke gerîlayî zaf dîqat kenê hema çîyêk nêbîyo. Eke wina nêbîyêne nika rewna pêkewtişan dest pê kerdbi. Dewleta tirke rixmê heme îmkananê xo vera gerîlayan felç bîya. Nika ci rê darba mergî hewce kena. Rewşa winayêne de gerîla vîneno ke PKK keno ke dewleta tirke biarisno la rixmê naye cehd keno ke wa mabênê înan de pêrodayîş mevejîyo. La eşkerayo ke hamnan ma do zaf rewşanê neweyan rê şahîdê bikerê.

Xora yeno zanayene ke herême de senî falîyetê MÎTî aktîf ê. Demê peyênî de nê falîyetî zî zêdîyayî. Falîyetê MÎT û Parastinî dewam kenê . MÎT wazeno herême de torra ajanîye rone  û pê naye operasyonanê taybetan bikero û darbe bido gerîlayan ro. Xora MÎT keno ke pê paştdayîşê PDKyî bitaybetî vera îdarekaranê PKKyî operasyonan bikero. Tay ajanê ke ameyî tepiştene ê bi xo vanê MÎT û Parastin senî pîya xebiteyenê. Dewleta tirke senî ke bi serran o Vakurê Kurdîstanî falîyetanê ajanîye kena, nika Başûrê Kurdîstnaî de pê destê PDKyî kena. Pê qala kilmê PDK û tay dezgehî sey şûbeyê MÎTî xebityenê.

Stratejîya dewleta tirke yê vera Başûrê Kurdîstanî mîyan nîya. 90yan de Barzanîyan reyde pêkerdişî ameyî kerdene.  Seba ke Başûr sey îdareyêkî bimano vera naye Barzanîyan zî herra Başûrê Kurdîstanî fîna xizmetê dewleta tirke. Şero leymino ke 1992yî ra heta 1996î dewleta tirke pîya bi PDKyî vera gerîlayan kerd hema vîran de yo.

Dewleta tirke Başûr sey erdê xo vînena û wina şuxulnena. Şar vera nê hêrsbîyaye yo la PDK şarî rê zext keno. PDK keno ke têkoşînê xelisyayîşî yê neteweyî yê têgêrayîşê PKKyî yo ke vera dewleta tirke keno, betal bikero. Wazeno ke şarê kurdî sey eşîrêkî îdare bikero. No statuyê Başûrê Kurdîstanî zî fîneno tehluke. Xora serkonsolosê dewleta tirke yê Hewlêrî talîmatanê Erdoganî ano ca.  Barzanî û merdimê ci mîyanê saltanatî de yê û şar feqîr o. Coka şar tim vera na neheqîye wirzeno payan ser. Herra Başûrê Kurdîstanî de gonîya bi se hezaran şehîdan esta. Nika PDKyî na herre binê linganê îşxalkeran de eciqneno û ramojneno ke senî vera şarê kurdî yo.

Ma prosesê tarîxî ra ravêrne û demê winayênî de kurdî bi yewbîyayîşî eşkenê ser bikewê. La sere de PDK tay hetî herinda paştîdayîşê gerîlayan de seba ke yewîya neteweyîye mebo û xoverdayoxî bêrê tesfîyekerdene xebityenê. Bi nê tewirî hem bi xo çîn kenê hem zî seserre kurdan rê danê vînîkerdene. Coka semedê kurdan yewîya têkoşînî zaf muhîm a. Seba ke PKK yewîye wazeno PDKyî wina ramojneno ke çew vano qey têna hewceyê PKKyî yewîye esta. Yewîya neteweyîye wezîfeya heme kurdan a. Ganî ma pêro berpirsîyarîya xo bîgêro xo ser û xo vîr a mekerê ke xoverdayoxî miheqeq do ser bikewê.''