Sîyasetmedarê kurdî Mehmed Emîn Pencewînîyî ANFyî rê qisey kerd û rewşa Başûrê Kurdîstanî ercnaye.

Pencewînîyî ard ziwan ke her kes zanenı dewleta tirke seba çinkerdşê Têgêrayîşê Azadîye pêro hêzê xo vist dewre û a wazena Helebî ra heta Mûsilî îşxal bikera. Pencewînîyî vat: ''Dewleta tirke hesabê ci kena ke armancanê Mîsak-i Mîllî û xeyalê Omanijan ê îşxalê warê petrol û gazê xozayî yê Başûrê Kurdîstanî bîyara ca. Dewleta tirke de krîzêko pîl o ekonomîk esto. Tikrîya her roje parçeyêkê Başûrî îşxal kena. Di hewteyan verî înan hezêko pîl ardo Dihokî. Nika zî Tirkîya wazena Şingal biviwna destî.''

Pencewînîyî îfade kerd ke dewleta tirke pê hêrişanê vera kurdan pêro peymanê mîyanneteweyî binpay kerdî û vat: ''Ganî kurdî û partîya kurdî vera Tirkîya yew bibê û îtîfaqê xo yê sîyasî bîyarê ca. Ganî kurdê pêro parçeyanê Kurdîstanî pîya venga Ewropa, NATO, Amerîka, Neteweyanê Yewbîyayeyan û dinya bidê û bimojnê nînan ke sîyasetê kurdan yew o. Sûrîye, Îran û Tirkîya wayîrê menfaatanê cîyayan ê la wexto ke babete tasfîyeya Têgêrayîşê Azadîye yê Kurdîstanî bena nê zî benê yew. Nê welatî tim xîret kenê ke mabênê kurdan de alozîyan vejîyê. PKKyî ra ber mîyanê pêro partîyanê ma de nakokîyî estê. Başûr de her terefo sîyasî hetêkî ra qisey keno. Dişmenê kurdî wazenê Rojhelat, Rojawan û Başûrê Kurdîstanî de têmîyan bikerê. PKK ganî ser sîwana hêzanê sîyasîyan  Vakur û Rojawanî kontrol bikero ke tede sey Başûr nakokîyî nêvejîyê werte. ''

Pencewînîyî pare kerd ke ne sîyasetê dinya ne zî menfaatê hêzanê neteweyîyan Erdoganî rê fayde nêkeno û sîyasetê Erdoganî rê paştî nêna dayene. Mehmed Emîn Pencewînîyî vat: ''Erdogan bi destsernayîşê waranê petrolî yê Kurdîstanî û tasfîyekerdişê PKKyî wazeno ke hewn û xeyalanê xo bîyaro ca la o do nêeşko ser bikewo. Ma hêvî kenê ke sîyaset û hîşmendîya Erdoganî do birijîyê.''