Çar rojan de yew adir ameyêne tavistene. Botanî seba ke moralê embazanê xo hol bikero vatêne ''No teorîya 'zaf biwere zaf enerjî bigêre' pûç a. Merdim çendek zî biwero beden goreyê hewcedarîya xo gêno.'' Tewr peyên qasê nêmeyê pêlekêkî birînç, yew di lap ardî û nême û yew pêlek fasulye mendî. Erzaqê înan têna hendek bi.

Xoverdayoxanê Mizgîne Dalaho, Armanc Simko û Têkoşîn Devrîm qala xoverdayîşê Girê Sorî yê 80 rojan kerde. Beşo diyîn wina yo:

Çewî qebul nêkerd ke vejîyo teber

Dima ke lewe ame qefilnayene înan mabênê xo de tay ercnayîşî kerdî. Botanî ard ziwan ke erzaqê înan tay o, erzaq biqedo zî ê do pê şirî îdare bikerê û kesê ke ney rê amade nîyê wa vajê. Botan cara waştêne ke tengîya erzaqî ra komêka gerîlayan bivejo teber û vat ke kam ke wazeno vejîyo teber wa vajo. La çewî nêwaşt gir biteriknê. Pêro gerîlayan bi qerardarî vat ke ê do heta peynî xo ver bidê û seba ney soz da. Botanî na qerardarîye ra dima çew nêvet teber. Hûmara înan heta roja peyêne 10 bîye.

Şehadetê Bazî

Ame plankerdene ke berê Çarçela reyna abibo û tira çalakîye bêra kerdene. La seba ke herre vera verdîyayêne war akerdişê ci tay zehmet bi. Delale 6ê temmuze de berê Çarçela de nobetdar bîye. Wexto ke aye vengê leşkeran eşnawit xebere daye embazanê xo. Baz û Serhildanî çekê xo girewtî û vazdayî. Baz wexto ke nêzdîyê berî bi, dişmenî teqayîşêk kerd. Baz binê tesîrê gazî de mend. A roje dişmen gazo kîmyewî şuxilna. Verî têna zerrîya ey çîyêk nêgirewt, nêeşkayêne çîyêk rabikewo û sîneyê ci ra veng ameyêne. Baz saete 22.00 ra dima tengîya nefesî ante û seke xeniqîyayêne. Armancî vera jehrkewtişî derzînêke daye piro. Serê sibayî saete 05.00 de Baz nêeşka erdê xo ra bileqo. Ozgur û Mizgîne zî pê nêeşkayî. Wexto ke baz reyna bi xirab înan venga Armancî da. Verî ke Armanc bêro Baz xo ra şi. Wexto ke Armanc amebi Baz şehîd bibi. Armancî hem ci rê mesajê qelbî kerdêne hem zî bermayêne. Botanî vat: ''Armanc, Baz şehîd bîyo.'' La embazîya Baz û Armancî cîya bîye. Coka ey şehadetê Bazî qebul nêkerdêne.

Şehadetê Bazî ê zaf dejnabî, hewteyêk kampe de bêvengîye estbîye. Gerîlayan waşt ke Baz verê kampe de defin bikerê la beno ke dişmen înan bibîyêne yan zî pê teyara bidîyêne piro. Înan Baz cayêkê bînî de defin kerd û nameyê nê cayî kerd 'Mewzîya Şehîd Bazî.' Zereyê qutuyêke de nameyê ey ame nusnayene. Gerîlayî wina fikirîyayî ke artêşa îşxalkere xo apey bigêra yan zî rewşe biba holêr cenaza do uca ra bêra vetene.

Baz şehadetê Mam Zekîyî de hetê ey de bi

Baz Geverij bi. Zap de perwerde dibi, Şingal de hetê Mam Zekîyî de mendbi. Wexto ke Mam Zekî şehîd bibi Baz zî birîndar bibi. Tedawî ra dima o reyna agêrabi koyanç O cepheyê Basya yê Girê Silêmanî de 2 serrî mend. Girê Silêmanî eyaletî ra dûrî bi la Bazî nê girî ra hes kerd. Merdimî pê Bazî moral girewtêne. O Silêman, Qertal û Girê Sor de bi wayîrê kedêka pîle û ey na kede vete lewe.

Baz Girê Sor  de şehîdo verên bi, nê şehadetî xora tesîrê înan kerd ka pêroyînan de hîsê qesasî geş bi. Pêroyînan zî zanayêne ke Baz ne şehîdo yewin bi ne zî do şehîdo peyên bibo. Ê pêro gerîlayan waştêne şorê derbe bidê dişmenî ro. Botanî paştî dayêne pêro embazanê xo. Berê Çarçela ame zixmkerdene. 2-3 rojan ra dima dişmenî lewe de teqayîşêk kerd la seba ke hînî tira cewab nêameyêne dişmen nêşi serê leweyî. Qefilnayîşê berê Çarçela ra dima hukmê serê dişmenî kêmîyabi. Dima dişmenî 13ê temmuze de reyna berê Çarçela de kîmyewî xebitna. Rixmo ke tedbîrî ameyî girewtene gaz saetêke korîdoran ra nêvejîya. Reyna boy û tamê şekerî ameyêne.

Vengê qirayîşî ameyêne zereyê tunelan

Qefilnayîşê berê Çarçela ra dima dişmenî verê xo da cepheyê Govende. Hetê leweyî ra vengê leşkeran ameyêne. Seba ke ganî înan xo bi kindiran bikerdêne war no zehmet bi. Rojêke gerîlayan dî ke 1 leşkerî leşkerêko bîn koordîne kerdêne. Leşkerî xîret kerdêne ke teqaberî bierzo zere. Nişka ra sey boya kîmyewîye boyêke ameye. Înan teqaber eşt la nêeşkayî bierzo zere. Dima înan verê xo da tunelanê mewzî. Gerîlayan seba ke qereqolî bivînê her tunel de pancerayî viraştbî. Verî nê berî hetê teyarayan ra ameyî pirodayene. Şîdetê teqayîşan vera bîyêne zêdêr. Gerîlayan ge ge bombayê destî eştêne dişmenî. Gerîlayan dafikêke naye ro; wexto ke ê vengê dişmenî bieşnawê do bomba bierzê. Dişmenî mewzîya Şehîd Têkoşînî de ca dayêne xo. Gerîlayan hetê Leylekî ra pê bombayan dayêne dişmenî ro, waştêne xebatanê mewzî vindarnê. Her ke bomba erzîyayêne vengê qîrayîşê leşkeran ameyêne heta zereyê tunelan.

Verî Armanc birîndar bi

Armanc û Serhildan a roje saete 10.00-12.00 de nobetdar bîyî. Vengê dişmenî berê Şehîd Têkoşînî ra ameyêne. Îmkanê gerîlayan estbîyî ke mewzîya Leylekî ra vejîyê coka derbazê uca bîyî. Seba ke bala dişmenî biancê xo ser înan boma eşte, guleyî eştî û dekewtî zereyî. Armancî dima ke pencera ra ewnîya hetê Leylekî teqayîşêk qewimîya. Armancî xo eşt zere, zerar nêdî. Serhildan teqayîşî ra dima bomba eşte. Serhildan kewt zere û Armancî rê vat: ''Dişmen ho gêreno cenazaya to.''

Dime ke dişmen ame qismê mewzî pêser teqayîşî qewimîyayî. Verî Armanc birîndar bi. Tarîx 20ê temmuze bi. O wexto ke şîyêne mewzîyan kontrol bikero teqayîş de birîndar bi. Têkoşîn û Ozgur pê vazdayîşî şîyî hetê ci. Kincê Armancî bibî parçe-parçe. Ma heta cayêk Armanc ard, korîdoran de Têkoşînî Armanc berz manga. Çimê ci mor bibi, birîndar bibi û rewşa ci hol nêbîye.

2 rojan ra pey Serhildan birîndar bi

Di rojan ra dima gerîlayan do pê bombaya destî mayîn biviraştêne. Serhildanî do mayîn bieştêne, Mizgîne zî mayîn do biteqnayêne. A hele ke înan na çalakîye kerdêne gerîlayî pê hesîyayî ke dişmenî teqaber şawito verê berê Leylekî. Serhildanî sereyê xo girewt binê çenganê xo û xo eşt war. Netîceya teqayîşî de Serhildan birîndar bi. Têkoşîn û Botanî o ard heta cayêkî. Înan Serhildan kerd wesayîtê destî û berd. Serhildan xeylêk cayanê xo ra birîndar bibii gonîya ci vera şîyêne. La hişê ci cayê ci de bi û eşkayêne qisey bikero. Serhildan wextêkê dergî erd ser de qeldîyaye mend.

Dişmenî hêrişanê vera na mewzî ra hînî netîce girewtêne. Gerîlayan zî hînî o het zaf nêşuxilnayêne. Birîndarbîyayîşê Serhildan û Armancî ra dima hûmara nobetdaran kêmîyabî. Hînî gerîlayî zaf qefilîyayêne. La reyna zî hetê birîndaran de huyayêne, qisey kerdêne. Seba ke di gerîlayê camêrdî zaf qefilîyabî bara girane milê cinîyan de mende. La înan zî qefilîyayîşê xo belû nêkerdêne.

Botan pê fuze birîndar bi

Botan hewteyêkî ra dima wexto ke şîyêne kontrolkerdişê mewzîyan berê Leylekî de pê fuze birîndar bi. Pê qewetê fuze Botan qasê 10 metreyan zîtê cêrî bi û gina dêsî ro. Botan zaf zixm bi. Pê halê xo yê birîndarî o şi cayê embazanê xo û vat: ''Çîyêkê mi çin o, tîya ra şorê.'' O bi xo hende manga ame, hende wayîrê îradeyî bi. Ey zanayêne ke ganî gerîlayî tira hêz bigêrê. Seba birîndaran werdo cîya ameyêne pewtêne la Botan no qebul nêkerdêne. Yew goşê ci teqabi û sîneyê xo ra zorî antêne la cade o ame xo ser. Hînî nobete ci rê ameye qedexekerdene. Înan vatêne ''Embaz Botan dişmen reyna pê to nêeşkayo.'' Ey zî vatêne: ''Dişmen 12 serrî yo pê mi nêeşkayo, nika zî nêeşkeno.''

Birîndarbîyayîşê Botanî zaf tesîrê gerîlayan kerd. La Botan lez ame xo ser û pê coş û moralî tewrê xebatan bi. Botan verî zî birîndar bibi. Hema hema her cayê xo ra birîndar bibi. Botan rojêke zî erd de nêmend. O hem fermandarê herême, hem fermandarê girî, hem wezîfedarê weşîye hem zî xebatkarê mitbaxî bi. Yanî o her çîyê Girê Sorî bi. Pêro gerîlayan zî paştî dayêne ci. Mîsal wexto ke vengê dişmenî ameyêne verî o şîyêne bomba eştêne. Nêverdayêne gerîlayî şorê. Gerîlayan vatêne: ''Tim ti karî kenê, ti fermandarê ma yî eke çîyêk bêro to sere ma do se bikerê.'' Ey zî vatêne: ''Şima pêro milîtanê Apoyî yê, wayîrê îradeyî yê. Eke çîyêk bêro mi sere şima do heqê her çîyî ra bêrê. Ma ganî çîyêkî xo rê asteng mekerê. Çunke eke dişmen bizano nê tunelan de ma ra yew ten zî esto nêefteno nêzdîyê ci bibo.''

Erzaq kêmî bi

Şehadetê Bazî ra dima berê Çarçela ame zixmkerdene û hînî nêşuxilîya. Zanîyayêne ke dişmen şekefteyêkê winasênî de nêeşkayêne hêrişê pêro qatan bikero. Dişmenî pê kindiran bomba eştêne qata mîyanêne. Botan û Delale uca de bîyî û qetî nêkewtêne ra. Ê pê her hewcedarîya gerîlayan bilîyayêne. Gerîlayan seba wirdemînan vatêne ''Ê koordîneyê ma yê şerî yê.'' Înan zî vatêne: ''Na qate hînî namusê ma ya.'' Delale ciwan bîye, reya verêne dişmen dîyêne la qerardar bîye.

Çar rojan de yew adir ameyêne tavistene. Botanî seba ke moralê embazanê xo hol bikero vatêne ''No teorîya 'zaf biwere zaf enerjî bigêre' pûç a. Merdim çendek zî biwero beden goreyê hewcedarîya xo gêno.'' Tewr peyên qasê nêmeyê pêlekêkî riz, yew di lap ardî û nême û yew pêlek fasulye mendî. Erzaqê înan têna hendek bi. Înan pê awe şorbaya rizî  pewtêne. Înan têna payan ser o vinderê û nobete bigêrê çîyêk werdêne. Çewî nêwaştêne mird biba. Cara şeker û sol çinbi. Fasulye tam nêameyêne pewtene. Botanî vatêne: ''Wa biwerîyo, bes o'' û tay salça eştêne mîyan. Têna birîndaran rê pîlawê bulxurî dayêne.

Pêro gerîlayan ey ra hêz girewtêne

Botanî tim vatêne: ''Eke çîyêk bêro sereyê ma rêxistine do vaja 'Înan pê ruhê Kemal û Zîlanan xo verda.' Mi nêwaştêne embazî mîyanê nê şertan de bêerzaq bimanê la reyna zî ma sereberz ê.'' Ey têna seba motîvasyonî nê nêvatêne, zerrî ra pê naye bawer kerdêne. Pêro gerîlayan Botanî ra hêz girewtêne. Gerîlayan kêmîya erzaqan xo rê derd nêkerdêne. Înan tay awa pendîrî vera jehrkewtişî nênimitêne. Gerîlayan ge ge tunelan ra vatêne: ''Embazî bêrê, embaz Botanî ewro dûye û bulxur viraşto.'' Xora her çi tay bi, gerîlayî pê mirdî nêbîyêne la gerîlayî reyna zî bimoral bîyî û awa pendîrî sey dûya mastî werdêne. Botan bibi sey mamostayê înan. Ey pêro teorîyê merdimîye kerdêne pûç. Qerardarî, îrade û bawerîya ci her çi mumkîn kerdêne. O raşta zî zaf jîhat bi.

Birîndarbîyayîşê Ozgurî

Birîndarbîyayîşê Botanî ra dima têgêrayîşê dişmenî zaf sixletin nêbi. Dişmenî serê girî de giranîye daye xebata mewzî û kerdêne ke berê şûmşînî biqefilno. Dişmenî her roje herre eştêne berî la gerîlayan zî her şewe ber akerdêne. Dişmenî hetê Şehîd Têkoşînî de teqayîşêk kerd, o ber zî abi. Gerîlayan hînî zanayêne ke ber do bêro qefilnayene. Cara gerîlayan waştêne uca de çalakîye bikerê. Ozgur nêzdîyê 20ê tebaxe de wexto ke şîbi çimdarîya dişmenî bikero teqayîşêko pîl qewimîya. Ozgur pê qewetê teqayîşî binê pêlakan de mend. Botan ame û vat: ''Vengê xo mekê, wa dişmen nêzano birîndar esto.'' Serê pêlakan de qutuyê salça estbî ke wexto ke dişmen bêro veng bivejo. Qutuyêke ginabî çareyê Ozgurî û sereyê ci pê giranî birîndar bibi. Ozgur ame nişnayene wesayîtê destî û ame berdene bi manga.

Ê şuxilnayîşê madeyê teqaberî yê dişmenî de wayîrê kêm tecrubeyan bi. Heta ke ê terzê dişmenî musayî xeylêk embazî birîndar bîyî. Gerîlayan mangayan ra brandayî pakerdêne, ê brandayî pê kabloyan deştêne û sey pêlekî şuxilnayêne. Xora kam şêro nobete wezîfeyê ci deştişê kabloyan bi. Mewzîyan de zaf teqayîşî qewimîyayêne û embazî tewr zaf ê çaxî birîndar bîyî. Malzemeyê weşîye tay bîyî. Wexto ke Serhildan birîndar bi malzemeyê înan kêmîyabî. Seba ke malzemeyî tay bîyî înan atletî qesnayêne ke sey pêçî bişuxilnê û birînan pakî bikerê.

Do dewam bikero...