Seba wedaritişê tecrîdê serê Rayberê Şarê Kurdî Abdullah Ocalanî û seba baleantişê serê xoverdayîşê grevanê vêşanîye pîlê cimatî û komê bawerîye yê demokratîkî ameyî têver.

Pîlê cimatî awanîya HDP’yî ya Amedî de ameyî têver û waşt ke tecrîdê serê Rayberê Şarê Kurdî Abdullah Ocalanî bêro wedaritene.

Parlamenterê Amedî yê HDP’yî Mûsa Farisogûllari, endamê Meclîsê Mayanê Aşitîye û çalakwanê TJA tewrê kombîyayîşî bîyî.

Farisogûllari: Ganî Ma Tavilî Bikewê Mîyanê Têgêrayîşêk

Parlamenterê HDP’yî yê Amedî Mûsa Farisogûllariyî vat ke seba tecrîdê serê birêz Ocalanî wedarîyo ganî her kes bikewo mîyanê cigêrayîşan û vat ke “6 mengî yo grevê vêşanîye estê. 7 hezarî embazê ma grevê vêşanîye de yê. 8 embazanê ma seba şikitişê na bêvengîyaxo feda kerdî. Ganî ma xo krîtîk bikerê. Ganî ma embazanê xo bipawitêne. Hendî wextê bêvengîye nêyo.”

Dima ra seba wedartişê tecrîdî eşkerayîyêk amî dayene.

Eşkerayîye de nê ameyî vatene:

“Ma anê ziwan ke waştişê çalakwananê grevê vêşanîye waştişê ma yê û ma do her wareyî de xoverdayoxanê grevê vêşanîye dir bê. Ma veng danê heme sazîyanê demokratîkan û şaxanê cimatî ke wa xoverdayoxanê grevê vêşanîye dir bê.

Ma veng danê heme sazîyanê cimatkî û huqûqîyan ê mîyanneteweyîyan ke seba wedartişê tecrîdî bikewê mîyanê cehdan. Ma veng danê dewlete û sazîyanê aye yê mesuldaran ke wa gureyanê xo bica bîyarê û nê problemî bi hawayêkê lezgînî hal bikerê.”