Goreyê xeberanê ke çimeyanê cayîyan ra ameyî girewtene nêzdîya dewa Sêgirkê ya Amedîye de gerîlayanê HPGyî rê hêriş ame kerdene.

Hêrişê PDKyî de 3 gerîlayê HPGyî birîndar bîyî. Hêriş saete 22:00 de dewam kerdêne. Hema hetê HPGyî ra eşkerayîya fermîye nêameye kerdene û detayê hêrişî nêameyî girewtene.

Bi hewteyan o PDK bi hemkarîya dewleta tirke vera waranê gerîlayan sewqîyat keno.

PDKyî semedê çalakîyanê protestoyî yê Başûrê Kurdîstanî ke vera hukmatî yenê kerdene PKK sûcdar kerdbi û reyna Şingal sey hedefî ramojnabi. Baldaro ke badê nayî hêriş ame kerdene.

Serekwezîrê Herêma Kurdîstanî Mesrûr Barzanîyî 9ê kanûne de derheqê protestoyan de eşkerayîyêke daye û verî ke delîlêk bimojno îdîa kerdbi ke 'PKK bi hawayêkê qerebalixêrî agêrayo Şingalî.'

Alozîya Çemankê

Başûrê Kurdîstanî de bi taybetî menga teşrîna peyêne ra nata hêriş, alozî û sewqîyatê leşkerî yê ver bi waranê gerîlayan zêdîyenê.

4ê teşrîna peyêne de nêzdîyê dewa Bêdade ya Çemankê de vera kampa gerîlayanê HPGyî di baskan ra xîretê operasyonî amebi kerdene.

HPGyî eşkerayîya xo de dabi zanayene ke înan nê xîretê hêrişî de çekî nêxebitnayî û sey hîşyarî wesayîtê zirxînî de mayin teqna. Heman eşkerayîye de wina amebi vatene: ''Ma nêwazenê bikewê pê.''

Eşkerayîya Mesûd Barzanîyî

4ê teşrîna peyêne de Hemserekîya Konseya Rayberdişî ya KCKyî eşkerayîyêke dabî û bale antbî eşkerayîyêka Mesûd Barzanîyî ser. Konseye hîşyar kerdbi ke nîyetê PDKyî esto ke şer bikero.

Barzanîyî eşkerayîya xo de îdîa kerdbi ke PKKyî xeta sînorî de 'tay cayî îşxal kerdî', mesuldarê qirkerdiş, vengkerdişê dewan, hêrişanê dewleta tirke zî PKK yo. Barzanîyî waştbi ke PKK xo nê waran ra apey bigêro.

Vera hêrişan bêvengîya PDKyî!

Mesûd Barzanî û selahîyetdaranê PDKyî heta nika vera baregeh, hêriş, îşxal û qirkerdişanê dewleta tirke tim bêveng mendî.

Başarê Kurdîstanî de baregehê ke bi destûrê PDKyî dewleta tirke 90an ra nata virazena, zêdîyayî. Serra 2020î de baregehê leşkerî, faalîyetê îstîxbaratî, vengkerdişê dewan û warê îşxalî bîyî zêdêr. Başûrê Kurdîstanî de hûmara baregehanê dewleta tirke resaye 40.

Goreyê rêxistina komelê sivîlî ya bi nameyê Christian Peacemaker Team serra 2015î ra nata hêrişanê dewleta tirke de tewr tay 97 kesî merdî, 100 kesî birîndar bîyî, 126 dewî ameyî vengkerdene û 500 dewî binê tehlukeyî de yê.

KCKyî ra vera nîyetê şerî yê Barzanîyî nêrazîbîyayîş

KCKyî derheqê mesele de wina vatbi:''Serekê PDKyî Mesûd Barzanîyî eşkerayîya xo de sebebê sewqîyar û ablûqayê vera gerîlayan pare kerdî. Bi nê hawayî ey mojna ke nîyetê înan esto ke vera PKKyî şer bikerê û seba naye pabeyê wext û firsend ê. Qet nîyetê ma çin o ke ma vera PDK yan zî hêzêkê kurdan şer bikerê.''

Endamê Komîteya Rayberdişî ya PKKyî Murat Karayilanî zî 25ê teşrîna peyêne de wina vatbi: ''Ma qet şerê zereyî nêwazenê. Ganî meseleyî pê dîyalogan çareser bibê. Ma nê fikrê xo de isrardar ê. Çunke şerê zereyî de stratejîya kurdan do bin bikewa û destkewteyê kurdan do bikewê binê tehlukeyî. Şerê Zereyî projeyê dewleta tirke yo. Ganî kurdî vera naye hîşyar bibê û dişmenî ra çîyêk nêpawê.''