Komîteya Rayberdişî ya PKKyî bi wesîleya serra 8. ya Qirkerdişê Parisî yo Ronayoxa PKKyî Sakîne Cansiz (Sara), Temsîlkara KNKyî ya Parisî Fîdane Dogan (Rojbîne) û Endama Têgêrayîşê Ciwanan Leyla Şaylemez (Ronahî) tede ameyî qetilkerdene eşkerayîyêke daye.

Eşkerayîye wina ya:

''8 serrî verî ronayoxa partîya ma PKKyî (Sara) û milîtanê ercîyayeyî Fîdane Dogan (Rojbîne) û Leyla Şaylemez (Ronahî) 9ê çeleyê 2013î de paytextê Fransa Parisî de hetê MÎTî ra bi hawayêkê bêexlaqî ameyî qetilkerdene. Ma hê dekewenê serra 9. ya têkoşînê vera Qirkerdişê Parisî. Hêverî ma şehîdanê xo Sara, Rojbîne û Ronahî bi minet, rêzdarî û heskerdişî yad kenê. Sey têgêrayîş û şarî ma do serra 9. de kiştoxanê faşîstan ra bi xurtî hesab bipersê û armancanê înan bîyarê ca.

Qirkerdişê Parisî qirkerdişêkê AKPyî bi

Seke zanîyeno Qirkerdişê Parisî qirkerdişêkê AKPyî bi û Qirkerdişê Roboskî ra 13 mengan dima qewimîyabi. Bira qirkerdişî hetê hukmatê AKPyî ra dîyaye û qirkerdiş hetê MÎTî ra ame caardene. Endamê MÎTî Omer Guneyo ke xo sey 'şorişgêr' şinasna û kewt mîyanê têgêrayîşê ma werteyê Parisî de 3 cinîyê şorişgêrî pê çeke kiştî. Qirkerdişî ra dima Omer Guney tepişîyabi û selahîyetdaranê AKPyî Erdogan, Huseyîn Çelîk û M.A. Şahînî zî pê eşkerayîyanê xo seke mesuldarîye girewte xo milî.

Rixmo ke nê pêro eşkera bibî ame parekerdene ke Omer Guney mehkeme ra verî zîndan de merd û dewaya Qirkerdişê Parisî nêameye kerdene. Fransa Erdoganî ra hesabê qirkerdişî nêpersa û edalet nêard ca. Bi nê hawayî Fransa xo kerd hemkara nê qirkerdişî. Omer Guney raşta zî merdo yan nêmerdo yan zî kişîyayo nê pêro persî hema zî mezgan de yê.

Seba ke mesuldarê nê qirkerdişî nêameyî hukmkerdene seke qirkerdiş her roje dewam keno. Şexsê cinîyan ê kurdan, şarê kurdî, merdimîya azade û demokratîke de her roje newe ra Qirkerdişê Parisî qewimîyeno. Heta ke sîstemê TCyî yo kolonyalîst û kiştox bimano na rewşe do wina dewam bikera.

Embaze Sara tim mîyanê têkoşînî de bîye

Embaze Sara warê Terteleyî Dêrsim de bîye pîl, ciwanîya xo de Rayber Apoyî reyde bîye şinas û dima zî tewrta têkoşînê azadîye yê Kurdîstanî bîye. Embaze Sara cinîyêka şorişgêr, têkoşîner û welatperwere ya kurde bîye. Aye vera cuntaya 12ê Êlule Zîndanê Amedî de Mazlûm, Kemal û Hayrîyan reyde rayberîya xoverdayîşî kerde û bîye ronayoxêka PKKyî, Endama Komîteya Merkezî, Raybera Têgêrayîşê Azadîye yê Cinîyan.

Embazanê ma Rojbîne û Ronahî zî Ewropa de xeta Apogîrîye de xo perwerde kerd û bîyî milîtanê serkewteyî. Înan pê xebatanê xo bîyî milîtanê rayberî yê ciwanan û cinîyan ê kurdan.

Wayûbiratîya şaran û merdimîya azade kişîyayî

Guleyo ke 9ê çeleyî de Sara, Rojbîne û Ronahî rê erzîya eslê xo de Rayberîye, şarê kurdî û Têgêrayîşê Azadîye rê erzîya. Nê guleyî vera çareserîya demokratîke ya meseleya kurdan bîyî. 9ê çeleyî de Paris de pê nê guleyan ame kerdene ke têgêrayîşê azadîye yê cinîyan bêro astengkerdene. 9ê Çeleyî 2013 de wayûbiratîya şaran û merdimîya azade kişîyayî.

Ma 8 serran vera hîşmendîya Qirkerdişê Parisî têkoşînêko pîl kerd. Ma Sara, Rojbîne û Ronahî kerdî sembolê Şorişê Cinîyan ê Azadan û têkoşînê azadîye yê Kurdîstanî û pêro dinya de ê dayî şinasnayene. Bi nê hawayî ma dewleta tirke ya ke dişmena kurd û cinîyan a û hukmato faşîst ê AKP-MHPyî teşhîr kerd.

Serra 9. ya Qirkerdişê Parisî de ma do têkoşînê vera Qirkerdişê Parisî û Hemleya 'Wextê Azadîye yo' bikerê yew û Kurdîstan, Rojhelatê Mîyanêbî û pêro dinya de têkoşîn bihêzêr bikerê. Ma do tecrîdê Îmraliyî bişiknê, faşîzmê AKP-MHPyî birijnê û bi nê hawayî mesuldaranê Qirkerdişê Parisî ra hesab bipersê. Ma vîrameyîşê şehîdanê xo Sara, Rojbîne û Ronahî azadîya Rayber Apoyî de, Kurdîstanê Azadî de û Rojhelatê Mîyanênî yê Demokratîkî de bidê ciwîyayene. Ma do seba şar û embazanê xo xeta şehîdan de seba azadîye zêdêr xo ver bidê û ser bikewê.

Nê esasî ser o sere de cinîyî û ciwanî ma venga pêro şarê xo yê welatperwerî, şorişgêr, demokratan danê ke Qirkerdişê Parisî bi çalakîyanê hîna bi tesîran protesto bikerê, her ca de tewrê çalakîyan bibê, serra 9. ya qirkerdişî de vera dîktatorîya AKP-MHPyî Hemleya 'Wextê Azadîye' aver berê û bi metodanê zengînan bîyarê ca!''