Komîteya Rayberdişî ya PKK’yî derheqê serrgêra îdambîyayîşê Denîz Gezmîş, Yûsûf Aslan û Huseyîn Înanî de eşkerayîyêka nûştekîye weşanaye. Eşkerayîye de nê ameyî vatene:

“Serkêşê THKO’yî Denîz Gezmîş, Huseyîn Înan û Yûsûf Aslan ê ke 6’ê Gulan a 1972 de ameyî îdamkerdene, 47 serrî serê îdambîyayîşê înan ra ravêrt. Serrgêra îdambîyayîşê înan de ma nê her hîrê serkêşanê ciwananê Tirkîya û Kurdistanî û yê şaran bi vîr anê û ma sozê bicaardişê vîrameyîşê înan bi hemleya ‘Ma tecrîdî bişiknê, faşîzmî birijnê û Kurdistanî azad bikerê’ danê.

Yewîya Rayber Abdullah Ocalanî, Hakî Karer û Kemal Pîrî yê mîyanê refanê PKK’yî bi bingeyê şorişgêrîye dewam kerde. Qîrayîşê Denîz, Yûsûf û Huseyînî yê gama îdambîyayîşî de ke vatêne ‘Biciwîyo yewîya şaranê Tirkîya û Kurdistanî û mucadeleyê înan’ nê esasî ser o bica amî.

Nika zî yewîye û mucadeleyo hempar ê şar û şorişgêranê Tirkîya û Kurdistanî yê mîyanê refanê HBDH’yî paştîya xo danê tecrubeyêkê winayênî. Mucadeleyê ‘Tirkîyeya demokratîke î Kurdistano azad’ ê hemverê faşîzmê AKP-MHP’yî nê esasî ser o bica yeno, do hîna pîl bibo û bireso serfirazîya tarîxîye.

Nê esasî ser o ma reyna hemra Rûbar –Huseyîn Poyraz- û hemra Xelîl û Mûrat ê ke serranê dergan mîyanê mucadeleyî de mendî bi vîr anê. Nê hemrayê şehîdî tim vernîya ma kenê roşin û serkêşîya hemleya ‘Ma tecrîdî bişiknê, faşîzmî birijnê’ kenê. Ma vanê ke hemra Rûbar, Xelîl û Mûrat do tim mucadeleyê Kurdistanê azadî û Rojakewtena Demokratîke de biciwîyê.

Heman wextî de ma hemra Şîrîn Elemhûlî û 4 hemrayanê ke 9’ê Gulan a 2009 de hetê Îranî ra ameyî îdamkerdene, Ozan Mizgîne (Gûrbet Aydin) ya ke 11’ê Gulan a 1992 de Tetwan de şehîd bîye û serkêşê DKP’yî Ûlaş Bayraktaroglû yo ke 9’ê Gulan a 2017 de Reqa de, şerê hemverê DAÎŞ’î de şehîd bi, bi hurmet bi vîr anê. Ma bi eşkerayî vanê ke nê hemrayê ma do hemleya xoverdayîşî ya ‘Ma tecrîdî bişiknê û faşîzmî birijnê’ de biciwîyê û ma do amacanê înan bica bîyarê.”