Komîteya Rayberdişî ya PKK’yî bi wesîleya 1’ê Gulane eşkerayîyêka nûştekîye weşanaye û ard ziwan ke, “Ma şexsê sinifa karkere de kewenê 1’ê Gulane ke roja yewîye, paştdayîşî û mucadeleyî ya kedkar, şaranê bindestan û cinîyan a.”

Eşkerayîye de ame vatene, “Çar hetanê dinya de 1’ê Gulane bi xurtî û bi umîdî yeno pîrozkerdene. Ma; sey şar û têgêrayîş, bi mucadeleyê xo yê azadîye û demokrasîyî ke hemverê zihnîyetê faşist-qirkerdoxî de rayra benê, bi nê hawayî kewenê 1’ê Gulane. Şerê xo yê serkewteyî yê hemverê faşîzmê DAÎŞ’î ke bi belayê sereyê şaranê Rojakewtena Mîyanêne, bi hemleya xo ya xoverdayîşî ya bi nameyê ‘Ma tecrîdî biqedînê, faşîzmî birijnê û Kurdistanî azad bikerê’ hemverê faşîzmê AKP-MHP’yî de rayra benê. Nê bingeyî ser o ma 1’ê Gulane heme karker û kedkaranê azadîye, demokrasîyî û sosyalîzmî, û heme şaranê bindestan rê pîroz kenê. û serkewtişî wazenê.

Ma şexsê şehîdanê Taksîmî yê 1’ê Gulan a 1977’î û fermandarê ma yo gerîla yo şehîd hemra Ramazan Kaplanî de, heme şehîdanê xo yê 1’ê Gulane bi rêz û minet bi vîr anê, sozê xo tekrar kenê ke ma do amacê înan bica bîyarê û vîrardişê înan rê wayîr vejîyê.

Bêguman ütopyaya sosyalîzmî tewr zêde rastîya 1’ê Gulane de xo ramojnena. 1’ê Gulane seba azadî, seypêyîya zayendî, parekerdişê komunalî û paştdayîşî bîyo merkez û ruhê mucadeleyî. Sosyalîzm rastîya ganeyan îfade keno. Naye ra tu hêrişê modernîteya kapîtalîste nêeşkeno nê ruhê 1’ê Gulane zihîf bikero, nêeşkeno mana û muhîmîya 1’ê Gulane hetê şaranê bindestan de kemî bikero. Eksê ci de, têvetiş, ruhê mucadeleyî, paştdayîş û yewîya 1’ê Gulane rayîrê averşîyayîşê mucadeleyê azadîye û demokrasîyî akenê.

Peymeyê Sosyalîzmê Demokratîkî bi Wesîteyanê Dewlete Nênê Bicaardene

Şerê Dinya yo Hîrêyin ke mabênê sîstemê sermayeya globale û statukoperwer a netewe-dewlete de qewimîyeno û merkezê ci Rojakewtena Mîyanêne ya, seba şaranê Rojakewtena mîyanêne û heme şaranê bînan hemverê hêrişanê faşîst û kolonyalist a kapîtalîste de îmkan û firsendanê pîlan dano. Merdimîye û bindestî heme kenê ke nê proseso ke dimayê binkewtişê Sosyalîzmê Reelî vejîyayo werte rast fam bikerê û îmkananê mucadeleyî bişuxulnê. Nê bingeyî ser o mucadeleyê sosyalîzmî yo demokratîk ê hemverê modernîteya kapîtalîste her wareyî de şen û hîra beno.

Labelê seba mucadeleyê azadîye, seypêyîya cîyarengan û demokrasîyî hîna xurt bêro rayraberdene, ganî sebebê binkewtişê sosyalîzmê reelî bi hîrayî û xorînî bêrê ercnayene û famkerdene, rastîya modernîteya kapîtalîste û halê ci yo mewcûd bi xorînî bêrê analîzkerdene. Bi nê hawayî hemverê modernîteya kapîtalîste de fehm, program û metodêko rast ê mucadeleyî bêro afernayene. Na çarçewaye de zaf muhîm o ke Teorîya Modernîteya Demokratîke bêro munaqeşekerdene û esas bêro girewtene ke hetê Rayber Abdullah Ocalanî ra amîya afernayene û rayîrê mucadeleyî yê xelasîya bindestan kena roşin. Nê bingeyî ser o ma veng danê heme hêzanê sosyalîstan ke bivînê sosyalîzmo demokratîk bi wesîteyanê îqtîdarî yê dewlete awan nêbeno, bingeyê cimatê demokratîkî ke xo seperneno azadîya cinî û ekolojîya cimatkîye ser o sey partî û têgêrayîş mucadele bikerê.

Dinyaya ke kewta destê hêzanê kapîtalîstan dinyayêke wêranbîyaye ya. Kapîtalîzm yeno manaya krîz, kaos, kolonyalîzm û şerî. Sîstemê modernîteya kapîtalîste bi xo nêeşkeno mîyanê Şerê Dinya yê Hîrêyinî ra vejîyo. Alternatîfo tekane yo ke merdimîye zereyê şerî, kolonyalîzmî û zextan ra xilas bikero sosyalîzmo demokratîk o.

Ganî Pîrozkerdişê 1’ê Gulane û Mucadeleyê Hemverê Tecrîdî Bibê Yew

Ma sey Têgêrayîşê PKK’yî seba bicaardişê nê hetê şorişî yê Kurdistanî û vilakerdişê ci yê herême bi heme hêzê xo mucadele kenê. Serkêşîya Rayber Abdullah Ocalanî û şehîdanê ma yê qehremanan, xoverdarîye û fedakarîya şarê m abi taybetî yê ciwanan, ma hîna kena aktîf. Bi mucadeleyêkê winayênî ma cewab danê hêrîşanê sîstemê modernîteya kapîtalîste û hêzanê netewe-dewletperestan ê faşîstan. Ma bi hemleya xoverdayîşî ya “Ma tecrîdî biqedînê, faşîzmî birijnê û Kurdistanî azad bikerê’ kewenê 1’ê Gulane. Ma ruhê mucadeleyî, paştdayîşî û yewîye yê 1’ê Gulane û hemleya xo ya xoverdayîşî ya hemverê tecrîdî kenê yew.

Mas ey şar û gerîla, koyan de, deştan de, bajaran de û zîndanan de bi heme metodan xover danê. Bi rayîrê nê mucadeleyî yê şar û gerîlayî, heta bi Xoverdayîşê Grevê Vêşanîye yo Pîl o ke bi serkêşîya hemsereka KCD'yî Leyla Guvene yeno rayraberdene, ma her metodê têkoşînê goreyê ca û wextê ci bica anê. Bi rayîrê nê mucadeleyî faşîzmê AKP-MHP’yî ver bi binkewtişî şino û no zî ramojneno ke ma do wextêkê kilmî de peynîya tecrîdî bîyarê.

Nê bingeyî ser o ma şehîdanê 1’ê Gulane reyna bi rêzdarî bi vîr anê, 1’ê Gulane yê şarê xo yê welatperwerî û kedkaranê dinya pîroz kenê û veng danê şarê xo ke her cayo ke tede yê beyraqa 1’ê Gulane berz kere, bi hawayêkê xurtî tewrê pîrozkerdişanê 1’ê Gulane bibê, pîrozkerdişanê 1’ê Gulane û hemleya hemverê tecrîdî bikerê yew, heme wareyî bikero wareyê yewîye, paştdayîş û mucadeleyî.”