Komîteya Têkilîyanê Teberî ya PKKyî: Nê wextî de ke sere de dewleta tirke xeylêk hêzê sîyasîyî hêrişê partîya ma kenê ma pê paştdayîşêkê winasênî kêfweş ê. Ma paştdayîşê partîyanê ICORî selam kenê.
Komîteya Têkilîyanê Teberî ya PKKyî seba paştdayîşê Partî û Rêxistinan ê Şorişgêran (ICOR) eşkerayîyêke daye.
Eşkerayîye wina ya:
''Zaf cayanê dinya de partî û têgêrayîşanê sosyalîst û komunîstan pê eşkerayîyêka hempare hêrişê vera PKKyî û amadekarîya şerî ya vera têgêrayîşê ma yê Başûrî şermezar kerdî. Nê partî û rêxistinanê ke binê sîwana ICORî de ameybî yewca heman eşkerayîye de da zanayene ke ê paştî danê PKKyî. Nê wextî de ke sere de dewleta tirke xeylêk hêzê sîyasîyî hêrişê partîya ma kenê ma pê paştdayîşêkê winasênî kêfweş ê. Ma paştdayîşê partîyanê ICORî rê selam kenê. Ma nê paştdayîş sey ercîyaye vînenê û ma do pê têkoşînê xo nê paştdayîş manadar bikerê.
Yeno waştene ke Komployo Mîyanneteweyî yê vera Rayber Apoyî newe ra bêro kerdene û Têgêrayîşê ma yê Azadîye bêro tasfîyekerdene. Dewleta tirke nê hêrişî ferz keno. Coka dewleta tirke wazena ke pê kurdanê hemkaran û NATOyî vera têgêrayîşê ma bixebitna. PDKyî 2020 de waşt ke waranê gerîlayan bigêro binê ablûqa. Amerîka zî 6ê teşrîna peyêne ya 2018î de seba kişîyayîş û tepişîyayîşê qadroyanê têgêrayîşê ma xelate pêşkêş kerde. Nê wird kerdişî seyci yê. Nê komplo û planê tasfîye bêguman do zerar bidê kurdan. Xora xeylêk kurdî vera na polîtîka vejîyenê.
Bêguman hêrişê vera PKKyî hêrişê vera demokrasîya Rojhelatê Mîyanênî û hêrişê vera hêzanê demokrasî û azadîye yê dinya yo. Coka tewirê ICORî tewirêko demokratîk û şorişgêr o. Hetê bînî ra eşkerayîye de ame tesbîtkerdene ke tewr zaf şerê kurdan ê vera kurdan do zerar bido têkoşînê azadîye yê kurdan. Na hîşmendî û tewir zaf girîng a û ganî bipawîya.
Tewirê ICORî ma rê yeno manaya girîngîya yewîya neteweyî û paştdayîşê hêzan ê şorişgêran. Ma anê ziwan ke sey vizêr ewro zî ma do pê nê tewirî têbigêrê. Ma partîyanê sîwana ICORî rê têkoşînê azadîye, demokrasî û sosyalîzmî de serkewtiş wazenê.''
