Komîteya Tekîlîyanê Teberî ya PKKyî derheqê hêrişê îşxalê yê dewleta tirke yo ke bi paştdayîşê PDKyî vera Başûrê Kurdîstanî yeno kerdene de eşkerayîye daye û nê vatî:

''PDK bi plananê leyminan, komplo û propaganda vera menfeatê kurdan eşkera îxanetê tewr xirabinî yê heme wextan keno. Dewleta tirke ya îşxalkere vera kurdan polîtîkaya qirkerdişî rayra bena, qetil kena, bizorî erdê ci ra raqilnea, vera cenazayanê bimbarekan caardişanê bêehleqan kena. PDK paştî dano nê kerdişanê dewleta tirke û vera Gerîlayanê Azadîye yê Kurdîstanî şerê dişmenî de ca geno. Hende bîyo bêşexsîyet. PDK dewleta tirke ya îşxalkere-qirkere anceno Başûrê Kurdîstanî û verê îşxal û îlhakî akeno. Qirkerdişê xozaya Kurdîstanî, şar erdê ci ra qalinayîş, vêşnayîş û xirabekerdişê dewan pêro çarçewaya konseptê hemkarî yê dewleta tirke û PDKyî de yenê kerdene.

PDK têna hetê leşkerî ra paştî nêdano dewleta tirke ya îşxalkere. Eynî wextî de hêrişê îşxal û îlhakî yê vera Başûrê Kurdîstanî meşrû keno û nêşarmîyeno semedê nê xeylêk hetan reyde pêvînayîşan keno, heme îmkananê xo yê dîplomatîkan şuxilneno.

PDK bi zûr, xîle û entrîkayan propaganda keno ke PKKyî xirab ramojno, wina rojdemî bedilneno ke sûcanê xo binimno. Şarê ma PKKyî zaf hol sarisneno, zano azadîya şar û herra Kurdîstanî wazeno û semedê nê têkoşîn keno. Reyna zîhnîyetê nêrî yê PDKyî, dişmenîya ci ya vera cinîyan, ekolojî û xoza zî zaf hol zano. Inkey PDK qet nêşarmîyeno, zincê ci nêveşana vano şewatê Hewlêr û Kerkûkî hetê PKKyî ra vejîyayî. Ame belgekerdene nê şewatî bi hemkarîya MÎT û Parastinî vejîyayî. Dewleta tirke her roje  dewan û daristananê Başûrê Kurdîstanî  vêşnena. Hemkarê nê sûcî PDK yo.

Konseya Asayîşî ya Herêma Kurdîstanî ya ke têna qale de est a, eslê xo de konseya asayîşê keyeyê Barzanî ya, teqayîşê wesayîtê selahîyetdaranê PDKyî ra Ekrem Salîhî ra PKK berpirsîyar tepiş ke no  çîyo qestî yo, sûcdarîya namerd a. Ma na sûcdarîya bêheqî eşkera û bi tewirê zelalî red kenê. Badê na eşkerayîya PDKyî Başûrê Kurdîstanî de ça de beno wa bibo eke çîyêk bêro hemrayanê ma ser, berpirsîyarê nê PDK yo. Xora şarê ma zî ma zî zanê ke herêmanê cîya cîyayan ê Başûrê Kurdîstanî de, tarîxanê cîyayan de bi hemkarîya MÎT û Parastinî xeylêk şorişgêr, welatperwerî ameyî qetilkerdene û qetilkarî bi îmkananê Parastînî remayî û yenê pawitene.

Ganî heme şar, akedemîsyen, roşnvîr, partî û rêxitinê kurdan vera xeta îxanetî ya PDKyî xeta welatperîye de bibê yew. Têna wina ma eşkenê estbîyayîşê şarê xo, azadîye û destkewteyanê ci bipawê."