Komîteya Xebatanê Şehîdan a PKKyî derheqê hêrişanê dewleta tirke yê vera cenazayanê şehîdan de eşkerayîyêke daye. Eşkerayîye wina ya:

''Têkoşînê azadîye yê Kurdîstanî pê erjanê pîlan xo resna nê rohan û ewro zî safhayanê giranan û tarîxîyan ra derbaz bena. Her safha de bi hezaran şehîdî ameyî dayene. Derbê pîlî dîyayî îşxalkeran ro, sere de dewleta tirke û rejîmo faşîst ê AKP-MHPyî verê rijnayîşî de yê. Nê prosesî de cuyêka rûmetêne bîye îmkan. Her şehadetî bîye deyîrêka newîye. Şarê kurdî PKKyî reyde kewt rayîrê azadîye û estbîyayîşê xo pêro dinya rê îsbat kerd. Xêrê nê têkoşînî ra ma eşkenê kurdayetîye û merdimîya demokratîke ser o qisey bikerê. Garê, Avaşîn, Zap û Metîna de ruhê Apogîran qetî do bin nêkewo. Destpêkî ra nata PKK pê wayîrvejîyayîşê şehîdan karê xo pîl keno, sîstemê îmha û çinkerdişî yê vera kurdan parçe keno. Eke ma raştîya şehîdan ra dûrî bikewa dişmen eşkeno debikewo mezgê ma. Yan zî eke ma şehîdê xo nêarê vîrî, wayîrê mîrasê înan nêvejîyê ma nêeşkenê xo çinbîyayîşî ra bixelisnê.

Ewro Kurdîstan hem merkezê şerê hîrêyînî yê dinya yo, hem merkezê averberdişê xelisîyayîşê demokratîkî û awankerdişê cuyêka azade yo. Nê pêro sayê şehîdan de bîyî. Coka şehîdê Kurdîstanî, goristanê ma bîyî armancê hêrişanê gemarinan. Ewro hêrişê tewr pîlî vera şehîdgehan û cayanê fîrazan ê ma yenê kerdene. Efrîn de cenazayî goran ra yenê vetene, Amed de kerrayê goran şikîyenê, Xerzan de cenazayê şehîdan yenê remnayene. Bi nê hawayî ê ma de birînanê ke nênê dermankerdene akenê.

Şehîdî vera pêro koletîye û xizimkarîye tewirê welatperwerî yê. Tewirê cuya raştikêne û bingeyê rûmetî yê. No tewir vera îşxalê dewleta tirke û cergan ê serê Efrînî yo. Kurdîstan de êyê ke vera hêrişanê dewleta tirke yê serê goranê şehîdan tewir nêgênê wa xo rê nêvajê kurd yan zî merdim. Ganî vera dişmenê faşîstî û xizimkaranê ci tewirê xurtî bêrê mojnayene. Kurdîstan de kesê ke na barbarîya vera Efrînî şermezar nêkenê ganî nêeşkê nefes bigêrê. Nê kesî ganî sey hemkarê dewleta tirke ya îşxalkere bêrê dîyene û selam zî nêro dayene înan.

Vîrameyîş têna sey helêka zemanî nêno kerdene, vîrameyîş manaya caardişê raştîya komelkî ya. Merdimî yan zî komel vîrê xo vînî bikero xora hînî sey xo nêbeno. Coka wexto ke vajîyeno 'Ma vîrameyîşê şehîdan rê bibê cewan' wina vajîyeno ke ganî ma raştîye tewrê cuye bikerê, vera cuye mesuldarîya xo bîyarê ca, bibê însan. Tîya de ganî raştîya şehadetî bêra ercnayene. Şerto verên cuyêka manadar û rûmetên a. Kurdîstan de şerto verên însanbîyayîş o. Wexto ke şehîdê ma goranê xo ra yenê vetene, serê goranê înan de bazarê heywanan yenê akerdene û ma bêveng manenê ma eşkenê xo rê vajê însan? Ganî ma her hele seba şehîdanê xo mîyanê cigêrayîşî de bibê. Kesê ke xo rê vanê însan ganî vera hêrişanê serê goristan û cenazayanê şehîdan bibê wayîrê tewirî.

Nêm seserra Kurdîstanî de çêrî û şehadetê pîlî qewimîyayî. Ewro dewleta tirke hêrişê goristan û cenazayanê embazanê ma kena. No seba dewleta tirke kerdişêko newe nîyo. Bi taybetî se serranê peyênan de dewleta tirke waşt pêro rayberanê têkoşînê komelî bidê vînîkerdene. Êyê ke gorê Şêx Seîdî çin kerd, nêverdenê vîrê komelî de o gandar bimano. Ê ewro zî hêrişê erjanê komelî kenê. Pêro dîn û bawerîyan de verê merdeyan de hûrmet esto. Tarîxê dewleta tirke ya îşxalkere, bi taybetî tarîxê rejîmê faşîstî yê AKP-MHPyî na babete de mîsalo tek o.Ganî vera nê hêrişan tewir bêro mojnayene, heqaret, bêrezdarîya vera cenaza û goran nêrê qebulkerdene. Ewro Kurdîstan de rejîmo faşîst ê AKP-MHPyî û cergê înan senî eşkenê hende hêrişanê bêexlaqan bikerê? Gelo dişmeno faşîst hêzê xo bêvengîya kamî ra gêno? Bêguman her bêvengîye bena sebeb ke rejîmo faşîst ê dişmenî hêrişê erjan bikero.

Her ke xoverdayîş nêro kerdene gefê vera Kurdîstanî zêdîyenê. Hêrişê îşxalî û qirkerdişî yê vera Kurdîstanî wayîrê armancêkî yê. Dewleta tirke wazena her ca de îradeyê kurdan bişikna, Rojawanî ra heta Başûrî îşxal bikerai Şorişê Rojawanî çin bikera. Seba nê armancan zî paştî dîyena dewleta tirke. Hêzê serdestî yê dinya vera qirkerdişê kurdan, îşxalê Kurdîstanî bêveng ê. Amerîka, Ewropa, Rûsya pê rotişê çekan qirkerdişê kurdan meşrî kenê. No zî îsbat keno ke Kurdîstan têna pê xoverdayîşê kurdîstanijan eşkeno bixelisîyo. No zî pê famkerdişê raştîya şehîdan beno.

Rayber Apoyî bingeyê PKKyî şehîdan ser o awan kerd. Cewherê PKKyî de cewabdayîşê vîrameyîşê şehîdan esto. Averşîyayîşê Kurdîstanî û vejîyayîşê PKKyî xêrê şehîdan ra qewimîyayî. Her hele de ganî raştîya 'PKK Partîya Şehîdan a' mezg û zerrî de gandar bimana. Tewr zaf keyeyê şehîdan na raştîye zanenê. Êyê ke wayîrê vîrameyîş û xeyalanê şehîdan vejîyenê, xeta Rayber Apoyî û erhanê têkoşînî pawenê şarê ma yo welatperwer o. Çunke ma sayê şehîdan de benê Kurdîstanî. Wa çew na raştîye xo vîr a mekero. Êyê ke îşxalê Efrînî, Serêkanîyê û Girê Sipî rê bîyî hetkar, dormeyê gerîlayan gênê, erdê Başûrê Kurdîstanî roşenê ganî nêeşkê erdê Kurdîstanî de gamêke bierzê.

Ganî baş bizanîyo ke ma sayê şehîdan de ewro eşkenê dewaya cuya azade bikerê. Efrîn, Serêkaniyê, Girêspî, Başûr, Vakur, Avaşîn, Zap û Metîna de ciwanê kurdî seba şarê kurdî  bedenê xo vera bombayan, çeka kîmyewî û gazê jehrinî kenê mertal. Ganî pêro kurdî û terefgîrê azadî û demokrasî wayîrê mîrasê şehîdan vejîyê û vera îşxal û qirkerdişî xoverdayîşî pîl bikerê. Nê erdê fîrazî de cenazayê şerwanan ê ereb, kurd, asûr, sûryan, armenî û tirkan zî estê. Şorişê Rojawanî ameyoxê nê şaran o. Dewleta tirke û Erdogan wazenê nê ameyoxî xera bikerê. Ewro pê ruhê 'Vera faşîzm, qirkerdiş û tecrîdî wext wextê azadîye yo' wa xoverdayîşê şehîdan esas bêro girewtene, vera îşxal û faşîzmê Erdoganî apey gamêke nêra eştene. Cergê ke Efrîn, Amed, Xerzan û cayanê bînan de hêrişê erjanê ma kenê ganî kurdî înan rê xizimkarîye nêkerê. Dewleta tirke wazena bi nê hawayî kurdan bimusna cuyêka bêrumetêne, bêrj verda. 

Roje roja wayîrvejîyayîşê rûmetî û xeta şehîdan a. Eke kurdîstanijî goreyê na raştîye têbigêrê ma do bieşkê qala cuyêka namusêne bikerê. Ganî sere de şarê ma yo welatperwer pêro terefê demokratîk û azadîwaştoxî vera bêexlaqîya dewleta tirke ya faşîste vejîyê meydanan. Ganî temamîya Kurdîstanî de vera nê kerdişanê AKP-MHPyî her kes biherikîyo meydanan. Eke ewro ma wayîrê şehîdan nêvejîyê siba ma do rûmetê xo bipawê. Coka sere de Rojawan de pêro Kurdîstan de wa sîstenê îşxalî bêro rijnayene, cuya xayîn û xizimkaranê îşxalkeran bêra tarîkerdene. Ma pê şîarê 'Ma rûmetê xo pawenê' vera hêrişanê bêexlaqan ê dewleta tirke ganî bi her hawayî çalakîyî bêrê kerdene.''