Komîteya Rayberdişî ya PKKyî bi wesîleya Qirkerdişê Kizildere eşkerayîyêka nuştekîye weşanaye.

Eşkerayîye de wina ame vatene: ''Ma Mahîr Çayan û 9 embazê ci bi minet û rêzdarî yad kenê ke 30ê adara 1972yî de dewa Kizildere ya qezaya Nîksarî ya Tokatî de netîceya hêrişê cuntaya faşîste de şehîd bîyî. Ma do têkoşînê înan qetî bi Tirkîyaya Demokratîke û Kurdîstanê Azadî tacîdar bikerê.

Mahîr Çayan û embazanê ey bi çalakîya xo waşt ke verê îdamê Denîz Gezmîş, Huseyîn Înan û Yusuf Aslanî bigêrê. No tewirê înan bi taybetî têkoşînê vera faşîzmê AKP-MHPyî de vengdayîşêk bi.

30ê adara 1972yî de wexto ke 10 şorişgêrî şehîd bîyî, Fakulteya Mahîr Çayanî dersî boykot kerdî. Rayber Apo o çax Fakulteya Zanistê Sîyasî ya Zanîngehê Anqara de sinifa yewine de bi û ey serkêşîya boykotî kerde. Rayber Apoyî mesuldarîya xo ya şorişgêrîye arde ca. A roje ra dima zî Rayber Apo bi mesuldarîyêka pîle verê şaran û bindestan de têgêra.

Çayanî semînerêk de vatbi 'Tirkîya de meseleya kurdan est a û na mesele ganî bêra çareserkerdene.' Nê vatişî tesîrê Rayber Apoyî kerd. Ey bi serkêşîya boykotî mesuldarîya xo arde ca. Zîndanê Mamakî de Rayber Apo 7 mengî tepişte mend û wexto ke Denîz Gezmîş, Yusuf Aslan û Huseyîn Înan ameyî dardekerdene soz da ke pê xurtkerdişê têkoşînî înan bîyaro vîrî. A roje ra nata Rayber Apo bi têkoşînê xo wayîrê hesreta Mahîr, Denîz û Îbrahîman vejîya. Têkoşînê Kurdîstanê Azadî, Tirkîyaya Demokratîke û Rojhelatê Mîyanênî yê Demokratîkî serkêşîya PKKyî de heman wextî de têkoşînê pêro şorişgêran o.

Wayîrvejîyayîşê vîrameyîşê Çayanî û 9 embazanê ci bi hemkarîya têkoşînê şarê kurdî beno. Newroza 2022yî de şarê kurdî û hêzê şorişgêrî yê demokratîkî yê Tirkîya mil bi mil vejîyayî meydanan, înan îradeyê rijnayîşê faşîzmê AKP-MHPyî mojna. Ma pê bawer ê ke 1ê Gulane nê îrade û têkoşînê hemparî do xurtêr bikero. Nê esasî ser o ma venga şaranê Tirkîya danê ke seba caardişê armancanê şehîdanê Kizildere û pêro şehîdanê şorişî têkoşînê vera faşîzmê AKP-MHPyî pîl bikerê.''