Komîteya Rayberdişî ya PKKyî bi eşkerayîya nuştekîye veng da ke wa vera hêrişanê îqtîdarê faşîstî yê AKP-MHPyî şar wirzo payan ser.

Hêrişî tewr sere de Rayber Apoyî hedef genê

Eşkerayîye de nê ameyî vatene: ''Tayyîp Erdogan û hukmato faşîsto ke bi xîleyan nê vîjnayîş de reyna dîktatorîya xo daye domnayene senî ke ameyêne pawitene hêrişê xo yê vera kurdan zêdînayî. Sere de Îmrali û Herême Pawitişî yê Medya, vera Vakur, Başûr û Rojawanê Kurdîstanî, Şingal û heme komelê Tirkîya û şarê ma yê Ewropa bi paştdayîşê NATO û PDKyî zext û hêrişê xo yê terorî dahîna zêdînayî. Wazenê ke Rayber Apoyî binê tecrîdê Îmraliyî de bifatisnê, Gerîlayanê Azadîye yê Kurdîstanî bieciqnê, PKKyî tesfîye bikerê, şarê ma yê welatperwerî û dostanê demokratan rê çok bidê dayene, Vakurê Kurdîstanî de qirkerdişê kulturkî temam bikerê û Başûr û Rojawanê Kurdîstanî îşxal bikerê.

Bi paştdayîşê NATO, Astana û PDKyî hêrişî yenê kerdene

Nê hêrişî  sere de Rayber Apoyî hedef genê ke 25 serrî yo Îmrali de vera sîstemê qirkerdiş û îşkenceyî têkoşînê azadîye yê tewr muhîmî dano. Gerek semedê wayîrvejîyayîşê Rayber Apoyî çalakîyê bînî sey çalakîya Brukselî berê kerdene. Pîya bi hêrişanê vera Rayber Apoyî hêrişê vera Herêmanê Pawitişî yê Medya zî zêdîyayî. Hêrişanê vera Zap, Avaşîn û Metîna de her qeyde çekê qedexeyî yenê şuxulnayene. Eşkera yo ke artêşa tirke bi paştdayîşê NATO, Astana û PDKyî nê hêrişan kena. Bêşik Gerîlayê Azadîye yê Kurdîstanî sey hewt serranê peyênan vera hêrişê îşxalî yê peyênî zî bi hewayêkê qehremankî şer kenê û destûrê îşxalî nêdanê. Ma şervan û fermandaranê HPG û YJA Starî silam kenê înan rê serkewtiş wazenê.

Ganî têkoşîno topyekun bêro kerdene

Zaf eşkera yo ke Erdogan û Îtîfaqê Cumhurî yo faşîst wazenê hêrişanê xo aver berê. Nê hêrişî îdeolojîk, polîtîk û leşkerî yê û sere de ciwan û cinî heme komelî hedef genê. Sey kurdan û şaranê Tirkîya û heme merdimîye zî hedef kenê. Kenê ke heme xoza û erjanê merdimîye çîn bikerê.  Na çarçewe de ma xoverdayîşê Akbelenî silam kenê. Heme şarê ma, şarê Tirkîya û merdimîya demokratîke ganî vera hêrişanê îqtîdarê AKP-MHPyî xoverdayîşê azadîye û demokrasîyî topyekûn her warî de xûrtêr bikerê.

Wa destur medîyo falîyetanê ajanîye

Îqtîdaro faşîst hêrişanê xo têna bi îmkananê xo yê teknîkî nêkeno. Eşkera yo ke dahîna zaf bi hetkarîya ajan-hemkar, kesanê xayînan hêrişan kenê ke ser bikewê. Na çarçewe de her metodî şuxulnenî. Tersnenê, îmkananê şenikan teqdîm kenê. Bitaybetî dest erzenê kesanê welatperwer û demokratan ke zirarê tewr girdî bidê piro. Ganî sere de cinî û ciwanî heme şarê ma hîsgêr bo, destur nêdo nê falîyetanê ajanîye. Ganî vera xayînîye  têkoşîn bêro xurtkerdene

Zekî Şingalî û şehîdê tebaxe ameyî yadkerdene

Ma serrgêra Qirkerdişê Êzidîyan ke çeteyanê DAÎŞî 3yê tebaxa 2014 de destpêkerdene de yê. Sere de ma nê qirkerdişî şermezar kenê û xoverdayîşê şarê êzidîyan silam kenê. Ma şexsê Mam Zekî Şingalî de heme şehîdanê qehremanan ê nê têkoşînê pîlî, bi hurmet û mînet yad kenê. Ma sey PKKyî hela verêne ra paştî daye şarê xo yê êzidîya û semedê azadkerdişê Şingalî bi desan şehîdî dayî. Dima ame vatene ke 'PKK verê cuyeya sîvîle sîyasîye de asteng o' û ma naye ser o gerîlayê xo Şingalî ra peyser antî la panc serrî rarvîyertî înanê ke wina vat qet çareserîya demokratîke aver nêberde. Herinda nê de Pêkerdişê 9ê Teşrîna Verêne fîna dewre û zextê serê êzidîyan zafêr kerd. Ma nê hêzan hîşyar kenê ke wa sozê xo bîyarî ca û paştî bidê cuyeya demokratîke û xosere ya şarê ma yê êzidîyan. Seba ke êzidîyî reyna raştê qirkerdişî nêrê ma do na rewşe teqîp bikerê.

Ma şexsê hemrayanê xo Huseyîn Mahîr, Sari Îbrahîm, Agît Garzan û Atakan Mahîrî de heme şehîdanê tebaxe bi hurmet, heskerdiş û minetî yad kenê û sozê caardişê waştişanê înan newe kenê.''