Komîteya Paştdayîşê bi Keyeyanê Şehîdan a PKKyî eşkera kerd ke Salih Cizîr (Hasan Adir) 5ê hezîrana 2021î de hêrişê hewayî yê dewleta tirke de şehîd bîyo û o yad kerd.

Eşkerayîye wina ya:

''Têkoşînê Azadîye yê Kurdîstanî yo ke pê Rayraşîyayîşê Rayberîye yê 50 serran aver şîyo, ewro pê xoverdayîşê Zap, Metîna û Avaşînî resayo prosesêko tarîxî. Artêşa îşxalkere seba ke pê gerîlayan nêeşkaye sere de çeka kîmyewîye pêro metodanê gemarinan ana ca. La nêeşkaye xeta xoverdayîşî ya şehîdanê ma yê bêmergan bişikna. Coka dewleta îşxalkere bi wehşîtî hêrişê her cayî kena, herra Kurdîstanî ser o bombayan varnena. La ma pê bawer ê ke têkoşînê ma serê rayîrê şehîdanê çêran de qetî do ser bikewo.

Raştîya şehadetî ya PKKyî merdimê zanaye, exlaqî û çêr û îradeyî îfade kan. Ma pê xoverdayîşê şehîdan resayî nê rojan, ma deyndarê înan ê. Ma soz danê ke her hela xo pê fermanê şehîdanê xo derbaz bikerê. Ma embaz Salih Cizîr (Hasan Adir)o ke caardoxanê kulturê xoverdayîşî yê Botanî ra yo, serrgêra şehadetê ci de bi minet û rêzdarî yad kenê. Sere de keyeyê ey ê ercîyayeyî rê ma pêro şarê xo yê welatperwerî rê serweşîye wazenê.

Embaz Salih 1962 de Cizîre de dadîya xo ra beno û 1986 de Têkoşînê Azadîye yê Kurdîstanî de têkilîye virazeno. Vernî ra bi qerardarî tewrê xebatan beno, pê wendişê Serxwebûn û Berxwedanî xo aver beno û raştîya dişmenî hîna hol zaneno. Birayê ey Şehîd Çekdar 1986 de tewrê gerîlayan beno. Dima ke Şehîde Bêrîvane û Şehîd Baran 1988 de yenê Cizîre embaz Salih zî bi bi aktîfî tewrê xebatan beno.1988 de beyanê îtîrafkerî ser o o tepişîyeno û serrêke zîndan de maneno. 1990 de serewedaritişanê Cizîre de serkêşîye keno, Newroze de newe ra yeno destbendkerdene û îşkence vîneno. 1991 de zî derbazê Almanya beno.

Almanya de zî o bi qerardarî xebatanê rêxistinkerdişî keno, hetê dewleta Almanya ra di reyî tepişîyeno û 5 serran zîndan de maneno. Embaz Salih xebatanê Komeleya Keyeyanê Şehîdan û Vînîbîyayeyan (KOMAW) de ca gêno, agahîyanê serê şehîdan arê dano û seba ke vîrameyîşê şehîdan bipawo xîret keno. Embaz Salih tîya de keyeyan rêxistin keno û keyeyanê şehîdan de têkilîyêka nêzdîye virazeno. 2015 de zî embaz Salih agêreno hesreta xo ya pîl Kurdîstan.

Embaz Salih 2016 de Ocaxê Sakîne Cansizî yê PKKyî de perwerde gêno. Embaz Salih Mexmûr de ke warê şarê koçberî yê Botanî yo, seba xizmetê şarê xo têkoşînî rê dewam keno. Embaz Salih Cizîr 5ê hezîrana 2021î de hêrişê hewayî yê dewleta tirke ya îşxalkere de şehîd beno. Ma reyna şexsê embaz Salihî de pêro şehîdanê şorişî bi rêzdarî û minetî yad kenê. Ma soz danê ke dewleta tirke ya îşxalkere û hemkaranê ci yê xayînan ra qetî hesab bipersê.''

Nasnameyê Şehîd Hasan Adirî wina yo:

Nameyê Qodî: Salih Cizîr

Name û Peyname: Hasan Adir

Ca û Tarîxê Bîyayîşî: Cizîre, 01.01.1962

Maye: Vecîhe

Pî: Saîd

Ca û Tarîxê Tewrbîyayîşî: Almanya, 1991

Ca û Tarîxê Şehadetî: Mexmur, 5ê Hezîrana 2021î