Hamnan hêzê PDKyî kewtbî warê Zînî Wertê yê herêma Qendîlî. Zînî Wertê de 3 gerîlayî hetê teyatayanê tirkan ra kişîyaybî. Nêrazîbîyayîşanê rayaumûmîye ra dima alozîya Zînî Wertê kêmîyabî.

PDKyî 25ê teşrîna verêne de hêzê 'Leşkerê Gulane' yê Mesrûr Barzanîyî Garê, Metîna û waranê bînan ê gerîlayan de cakerdbi. Hêzanê PDKyî 4ê teşrîna peyêne de qezaya Çemankê ya dewa Bêbabdî de hêrişê kampa gerîlayan kerd. PDKyî rixmê hîşyarîya Fermandarîyanê Qeragehê Merkezê Pawitişî Şarî têgêrayîşê xo dewam kerdî û Begova, Brîfka, Batûfa û Banka yê Metîna de bendê kontrolî nayî ro û domreyê waranê gerîlayan girewt. 21ê teşrîna peyêne de hêzê bi 300 kesan û 56 wesayîtan sewqê warê Hecî Umran û Çomanî yê herêma Qendîlî ame kerdene.

13ê kanûne de zî PDKyî hêrişê gerîlayan kerd û 3 gerîlayî birîndar bîyî.

Dima ke nasnameyê Cahît Abdurrahmano ke goreyê îdîayan nê serebûtî de ameyo kiştene eşkera bi ame famkerdene ke no kes verî hetê PKKyî de şer kerdêne la dima rema û tewrê cerganê Roje bi. Kifş bi ke êyê ke hêrişê gerîlayan kerd cergê Roje yê.

Eşkera yo ke Mesrûr Barzanî zî sey dewleta tirke înanê ke PKKyî ra remayî keno kontra. Wina aseno ke PDK bi rayîrê cerganê Roje û Leşkeranê Gulane wazeno vera PKK netîce bigêro. Verî zî medya de ca girewtbi ke cergê Roje bi destê dewleta tirke yenê amadekerdene û perwerdekerdene.

Goreyê zanayîşanê ke çimeyanê herêmîyan ra ameyî girewtene, PDK wazeno bi destê cerganê Roje rayîrê Dêreşî de noqtayêke bivirazo û bi nê hawayî têgêrayîşê gerîlayan asteng bikero.