Polîsan bi wesayîtanê bizirxan eşt pansîyonê Zanîngehê Wanî ser û gef ro wendekaranê ke peysayîşê awe protesto kerdêne wend.

Pansîyonanê Wendekaran ê Zanîngehê Yuzuncu Yilî yê Wanî de 3 rojî awe peysabî. Wendekaran seba peysayîşê awe îdareyê zanîngehî protesto kerd, wendekaran çalakîyê vengvetişî, çilatefênayîşî û rayîrşîyayîşî kerdî. Polîsanê Asayîşê Wanî û TEMî bi wesayîtanê bizirxan hêrişê çalakîyan kerd, sere de pansîyonê cinîyan, eşt pansîyonan ser. Seba ke polîsan hêrişê çalakîyan kerd û polîsanê camêrdan eşt pansîyonanê cinîyan ser, çalakîyî bîy zêde. Dima ke çalakîyî bîy zêde Amîrê Şubeyê Asayîşî gef ro wendekaran wend û vat: "Bedelê ney esto, ma dima şima tahqîqatê asayîşî ra derbas nêkerê." Pansîyonê wendekaranê camêrdan de zî îdarekarê pansîyonî gef ro wendekaran wend.Tayê pansîyonan de peysayîşê awe dewam keno, tayê pansîyonan de zî awa çamurin û serdin yena dayene. Wendekarêkê camêrdî vat: "Pansîyonan ra boye yena, zimistan o la awa germine çin a. Naye ra ma waşt ke nêrazîbîyayîşê xo bimojnê la polîsan û îdareyê zanîngehî dormeyê ma girewt. Înan gef ro ma wend. Eke meseleyê ma bêrê çarekerdene ma do çalakîyanê xo biqedenê."