Rêxistina HDPyî ya Cizîre senedê şehîdanê ke hêrişê qirkerdişî yê dewleta tirke de bombardumanan de ameyî qetilkerdene, aktîvîteya vîrardişî organîze kerde.

Merdimê şehîdan, wekîlê HDPyî yê Şirnexî Hasan Ozguneş, Huseyîn Kaçmaz û aktîvîstanê TJA ya pîya xeylêk kersan waşt ke Goristanê Asrî yê Cizîre zîyaret bikerê. Polîsan destûr nêda la şarî peyser game nêeşt. Nayî ser o polîsan hêrişê şarî kerd. Merdimanê şehîdan vera polîsan hersê xo ard ziwan û vat: ''Şima domanê ma qetil kerdî nika zî esteyanê înan ra tersenê.'' Keyeyan vilikê ke ardî dekewtişê goristanî de nayî ro.

Wekîl Hasan Ozguneşî ke dekewtişê goristanî de qisey kerd vat: ''Êyê ke amayî qetilkerdene heme merdimê ma yê. Sey Mehmet Tunç û Aysele Yuksel bi seyan kesanê ke  ma reyde warê legal de sîyaset kerdêne ameyî qetilkerdene. Ma sey partîye wazenê heqê xo yê demokratîkî bişuxulnê û dejê keyeyan pare bikerê. Qetilkarî kam ê? Qey heta ewro cipêrsayîşêk zî çîn o? Ma do hesabê embazanê xo yê ke hetê hêzanê tarîyan ra bîlasebeb ameyî qetilkerdene bipersê. Ma do weletî nê cehenemî ra bixelisnê. Qet hêzêk nêeşkeno milê ma  çewt bikero. Ma semedê azadîye merg girewto çim. Şima partîye qefilne, kişenê, erzenê zîndan, se kenê bikerê şima do nêeşkê têkoşînê ma  bişiknê. Wa şikê kesî çinê bo, emrê faşîzmî kilm o.''