Bi fermanê Serekê Pêroyî yê AKPyî û Serekkomarê Tirkan Erdoganî qezaya Xelatî ya Bedlîsî de qeraxê Gola Wanî de qesre yena viraştene. Bi seyan karkerê ke bi erzanî tede yenê xebitnayene nêeşkenê pereyanê xo bigîrê.

Bedlîs û qezayanê ci de nîspetê bêkarîyê se ra 80 ya û coka zafêrî merdimê yê herême koç kenê. Demanê peyênan de koçberê tirkî yê ke Asyaya Mîyanêne ra ameyê na herême de yenê cakerdene û bi nê hawayî dewlete cad kena ke demografîyê herême bivurna. Çarçewa planê ‘Şark Islahat”î de ê şaristananê ke tede polîtîkaya “Tirkkerdişê Rojhelatî’ zaf yenê tetbîq kerdene ra yew zî Xelat o. Nika na eynî polîtîka bi destê Erdoganî yena kerdene. Bi qesra ke Erdogan Xelat de virazeno, wazenê nîşan bidê ke na herême ‘Warê Tirkan’ a. Bi fermanê Erdoganî seba ke tirkê Ahiskayî yê Ukranya tede bêrê cakerdene qezaya Ciminî ya Erzînganî û Xelatî ya Bedlîsî de TOKÎ awanîyan amade keno. Xelatî de bi nameyê Donetsk TOKÎ sîteyêka newe ameya awankerdene.

Vera karkeranê kurdan talankarî û mêtingerîye

‘Qesra Serekkomerîye” ya ke qeraxê Gola Wanî de yew warê 32 donimî ser o yena viraştene de bi seyan karkerî yenê xebitnayene. Qesra Erdoganî nêzdîyê di serrî yo ke yena viraştene, nêno zanitene ke heta nika ci rê çiqas pere ameyo pêşkêşkerdene. Qesre bi hawayêkê nimitkî yena viraştene. Kewtişê warê awanîsazîye û antişê fotografan qedexe yo. Derdorê înşaatî bi bendan ameyo girewtene û teberê înşaaat nêyaseno. Karkerê ke înşaatî de yenê xebitnayene cipersayîşanê emnîyetî ra yenê vîyarnayene û karkeran rê qedexe yo ke bi telofonî bikewê warê înşaatî. Zafêrîyê karkeranê ke Seraya Erdoganî de xebitîyenê Osmanîye, Kîlîs û Dîlokî ra ameyê ardene. Karkerê ke nê şaristanan ra ameyê ardene rojaneyê xo 150 heta 200 lîra yo. Karkerê ke şaristananê kurdan Bîdlîs, Wan, Agirî ra ameyê ardene rojaneyê xo 50-60 lîra yo.

Karkerêko ke qezaya Patnosî a Agirî ra yo û seba emnîyetê xo nêwaşt ke nameyê xo eşkera bikero ard ziwan ke o hamnan ra bîyo înşaatê qesre de gurîyeno labelê nêeşkeno pereyanê xo bigîro. Karkerî îfade kerd ke mîyanê karkeran de cîyakarî yena kerdene û vat “Çar aşme yo ke ez tîya gurîyena. Karanê tewr giranan bi karkeranê kurdan danê kerdene. Karkerê ke Osmanîye û Kîlîsî ra arde bi 150-200 lîra, karkeranê kurdan zî bi 50-60 lîra danê xebitnayene.  Nê pereyî zî demê ci de nêdanê. Warê înşaaatî û karo ke tede yeno kerdene bi hawayêkê nimitkî yeno kerdene. Karkerê ke bi telefon kewtê înşaatî û fotografê înşaatî medyaya komelkî de pare kerdê karî ra ameyî vetene.