Qezaya Nisêbînî ya Mêrdînî de varanê payîzî ra binawanîye rijîyena. Varan de rayîran de kortî virazîyayî û awe kortan de kom bena.

Qeyûmê Şaredarîya Nisêbînî rayîran nêvirazeno û şar ceza keno. Wexto ke şar muracat keno zî vano 'La ma viraşt?'

Tay kuçeyan ra ne wesayît ne zî merdimî eşkenê derbaz bibê. Cinîyan vera rewşe nêrazîbîyayîşê xo mojna.

Hayrîye Akara ke taxa Barişî de ciwîyena pare kerd ke hamnan de toz wurzeno û zimistan de zî çamur virazîyeno. Hayrîye vat: ''Zimistanan ma nêeşkenê kuçeyê xo ra vejîyê teberî. Rayîran nêvirazenê la şinê ceyran dekenê binê erdî. Ma wareyê xo de benê rezîl.''

Remzîye Ateş zî heman taxe de ciwîyena. Remzîye vat: ''Eke ma rê çîyêk lazim bo nêvirazenê la eke lazim nêbo virazenê. Domanî ne zimistanan ne zî hamnanan nêeşkenê kuçeyan de kay bikerê. Wexto ke varan vareno ma benê perîşan.''

Roniştoxa bîne Aysele Kardeş zî vat: ''Zerarî ra ber ma dewlete ra çîyêk nêdî. Ma merdim nîyê? Dewan de zî kuçeyî wina yê. Ma bi serran o ke mîyanê herre de yê.''

Semîre Şahîn vat: ''Ma keye de 15 kes ê û ma pêro zî bêkar ê. Ma mîyanê nê herre ra derbaz benê.  Şaredarîye çîyêk nêkena. Wexto ke ma şinê şaredarîye rê rewşe vana 'la ma rayîrî viraştî.' Hînî bes o, heta ewro înan qet yew xizmet nêkerd.''