Qeyûmê Sûrî yê Amedî nameyê taxa Kitilbîlî vurna kerd 'fetîh.' Taxa Kitilbîlî taxanê tewr kanan ê Kurdîstanî ra yew a û qesê 400 serrî ya. Goreyê vatişan Kitilbîl de verî armenîyî û sûryanîyî ciwîyayêne.

Taxe seba Zanîngehê Dîcle 1962 de pê îstîmlakî ameye vengkerdene. Nika taxe de qadê 10 hezar kesî ciwîyenê.

Roniştoxanê taxe vera kerdişê qeyûmî nêrazîbîyayîşê xo mojna û da zanayene ke bê xebera roniştoxan nameyê taxe vurîyayo. Roniştoxan ra Fesîh Karakuzuyî pare kerd ke keyeyê ci 200 serrî yo Kitilbîl de ciwîyeno û vat: ''Di rojî verî mixtar gêra mi û vat name vurîyayo. Înan verî ke rizaya merdiman bigêrê nameyê cayanê ma vurnayî. Nameyê nê cayî 400 serrî yo Kitilbîl o. Ê hûrmetê ma nêkenê coka ma ra nêpersenê.''

Karakuzuyî eşkera kerd ke îstîmlakî ra dima erazîyê taxe daxîlê zanîngehî ameyê kerdene û vat: ''Binê erdî de gorê ma est ê la erdê ma ame îşxalkerdene. Serê goran de kafeyî est ê. Înan erazîyê ma girewtî û ma dayî koçkerdene. Ma do nameyê taxa xo nêvurnê. Eke hewce bibo ma do şorê mehkeme. Binê nê kerdişanê înan de çîyo bîn est o. Ma do destûr nêdê ney.''