Qezayanê Amedî Farqîn, Erxenî û Çinar de rixmê tedayanê polîsan zî bi hezaran kesî şayîyanê Newroze de ameyî yewca. Farqîn û Erxenî de zî 19 kesî ameyî destbendkerdene.

Farqîn

Şayîya Farqînî de bi qiseykerdişê Hemşaredara Farqînî Naşîde Toprak fîrazkerdiş dest pêkerd. Şayîye de Rênçber Agirî vejîya sehne ser. Polîsan xîret kerd ke mudaxeleyê deyîranê Agirîyî bikerê la Agirîyî vera polîsan tewirê xo mojna.

Hemserekê HDPyî yê Amedî Zeyyat Ceylan û Wekîla HDPyî Remzîye Tosun zî vera ablukaya polîsan nêrazîbîyayîşê xo mojna. Şayîye de tecrîdê Îmraliyî bi sloganan ame protestokerdene.

Şayîya Farqînî de 10 kesî ameyî destbendkerdene.

Erxenî

Şayîya Erxenî de polîsan provakasyon kerd û 8 kesî bi bahaneya 'sloganan vanê' destbend kerdî. Polîsan nêverda ke domanî bikewê warê Newroze. Kokimo ke vera polîsan vat 'biciwîyo Serek Apo' pê şîdetî ame destbendkerdene. Hemserekê HDPyî yê Erxenî Zulkuf Bîrgulî verê bînaya partîye de qisey kerd û kerdişê polîsan şermezar kerdî. Wekîla HDPyî Dêrsime Dag zî ard ziwan ke amedijî cewabê nê kerdişan siba warê Newroza Amedî de bidê.

Çinar

Şayîya Çinarî de Hemsereka HDPyî ya Amedî Gulîstane Atasoy bale ante yewîya kurdan ser. Wekîlê HDPyî Îmam Taşçierî zî îfade kerd ke adresê çareserîya meseleya kurdan Îmrali yo. Qiseykerdişan ra dima Koma Dengê Amara waşt ke vejîya sehne ser la polîsan bi bahaneya 'kincanê herêmîyan' nêverda kome sehne bigêra.