Emser Newroze bi şîarê 'Wext wextê serkewtişî yo' yena fîrazkerdene. Xeylêk qezayanê Amed, Mêrdîn, Xarpêt û Şirnexî û şaristanê Kocaelî yê Tirkîya de şayîyê Newroze bi coşî ameyî kerdene.

Waranê Newroze de azadîya Rayberê Şarê Kurdî Abdullah Ocalanî ameye waştene, tepişteyê nêweş û sîyasîyî ameyî selamkerdene û vera hêrişanê îqtîdarê AKP-MHPyî mesajê xoverdayîş û têkoşînî ameyî dayene.

Cinîyî tewr vernî de bi kincanê herêmîyan tewrê şayîyan bîyî. Girseyan rixmê hewayê serdî û varayîşê vewre zî govende girewte, adirê Newroze vist ta.
Qezaya Depe ya Xarpêtî de 2019 ra dima reya verêne Newroze ameye fîrazkerdene. Hemserekê HDPyî yê Depe Sarîye Bal û Îmran Kiliç, Wekîlê HDPyî yê Riha Mehmet Ruştu Tîryakî tewrê şayîye bîyî. Tîryakîyî qiseykerdişê xo de veng da ke wa berê Îmraliyî abibê, tepişteyê nêweş û sîyasîyî bêrê veradayene. Qiseykerdişan ra dima waya Mazlûm Doganî Arîfe Dogan adirê Newroze vist ta. Girseyî pê deyîran û sloganê 'Cinîye, Cuye, Azadîye' dormeyê adirî de govende girewte. Şayîye ra dima ciwanan deyîra 'Ha gerîla' reyde çalakîya rayraşîyayîşî kerde.

Qezaya Bismilî ya Amedî de her çiqas polîsan bi bahaneya 'kincê rêxistine dayî xo rê' girse asteng kerd zî girse bi coşî derbazê warê Newroze bi û vera polîsan nêrazîbîyayîşê xo mojna.  Wekîlê HDPyî Dêrsime Dag, Îmam Taşçier, Garo Paylan, Hemsereka HDPyî ya Amedî Gulîstane Atasoy tewrê şayîye bîyî. Înan pîya adirê Newroze vist ta. Îmam Taşçier û Dêrsime Dag qiseykerdişanê xo de azadîya Ocalanî wşate û îfade kerd ke çew nêeşkeno verê xoverdayîşê kurdan bigêro.''

Qezaya Kerboranî ya Mêrdînî de Mayanê Haştîye, keyeyê Garîbe Gezera ke zîndan de amebî qetilkerdene, Vervatoxa HDPyî Ebruye Gunay, Hemserekê HDPyî yê Mêrdînî Salîh Kuday, aktîvîstanê TJA û şarî pîya adirê Newroze vist ta û xoverdayîşê zîndanan selam kerd.  

Qezaya Qilebanî ya Şirnexî de qiseykerdişê Wekîlê HDPyî  Hasan Ozguneşî ra dima adirê Newroze bi sloganê 'Biciwîyo xoverdayîşê zîndanan' ame tavistene. Şayîye de girseyî deyîranê hunermendan reyde govende girewte. 

Qezaya Basa ya Şirnexî de Wekîlê HDPyî Huseyîn Kaçmaz, aktîvîsta TJA Gulere Tunç û Rêxistina HDPyî ya Basa tewrê Newroze bîyî.   8 serran ra dima reya verêne Basa de adirê Newroze ame tavistene. Qiseykerdişan de ame vatene ke Abdullah Ocalan eşkeno meseleyanê nikayênan rê rayîrê çareserîye bimojno. Şayîye pê sloganê 'Biciwîyo Serek Apo' qedîyaye.

Qezaya Qoserî ya Mêrdînî de bi des hezaran kesî tewrê şayîya Newroze bîyî. Rêxistina HDPyî ya Mêrdîn û Qoserî, aktîvîstê TJA, Hemşaredarê Mêrdînî Ahmet Turk, Wekîla HDPyî Peroye Dundar û Mayê Haştîye şayîye de amade bîyî. Ahmet Turkî şayîye de venga pêro temsîlkaranê kurdanê çar parçeyanê Kurdîstanî da ke yewîya xo bîyarê ca. Peroye Dundar zî qiseykerdişê xo de waşt ke Ocalan bêro azadkerdene. Qiseykerdişan ra dima adirê Newroze ame tavistene. Şayîye ra dima ciwanan bi sloganê 'Biciwîyo Serek Apo' dest pê rayraşîyayîşî kerde.

Qezaya Şemzînanî ya Colemêrgî de şayîye dima ke Mayanê Haştîye adirê Newroze vist ta dest pêkerd. Şayîye de şehîdî ameyî yadkerdene. Wekîlê HDPyî Saît Dedeyî şayîye de qisey kerd û îfade kerd ke dewlete se kena wa bikera kurdî do tim têkoşîn bikerê. Dima girseyî yew fekî ra vat 'Ocalan îradeyê ma yo' û govende girewte. Şayîye pê govendan qedîyaye.

Hetê bînî ra qezaya Gebze ya şaristanê Kocaelî ya Tirkîya de zî şayîya Newroze ameye kerdene. Wekîlê HDPyî Omer Faruk Gergerlîoglu, Rêxistina HDPyî ya Kocaelî tewrê şayîye bîyî. Rixmê varayîşê vewre zî girseyî bi coşî adirê Newroze vist ta û govende girewte. Gergerlîogluyî şayîye de ard ziwan ke tecrîdê Îmraliyî vilayê pêro zîndanan bîyo û ganî cade bêro wedaritene. Şayîye pê deyîranê Rukene Demîr dewam kerd.