Qezaya Qoserî ya Mêrdînî de, qeyûmê rejîmê AKP’yî wextê destsernayîşê şaredarîye de dêsêko bi berzîya 2 metreyan dorê banê şaredarîye de viraştibi. Hemşaredara Partîya Şaran a Demokratîke (HDP) Nîlufer Elîk Yilmaze, endamê Meclîsê Şaredarîye û şarê Qoserî pîya dest bi rijnayîşê dêsî kerd. Hemşaredare Yilmaze bi horsî derba verêne daye dêsî ro.  Bi dore endamê Meclîse Şaredarîye û şarê qeza dest bi rijnayîşê dêsî kerd.

Şarê ma waşt, ma zî dêsî rijnayî

Hemşaredare Yilmaze ard ziwan ke ganî şaredarîyî şarî rê akerde bê û vat, “Wexto ke ma xebatê weçînayîşî kerdêne, waştişêk şarê ma bi. Vatêne, ‘wexto ke ma şonê şaredarîye, ma xo sey hepisxane de hîs kenê. Hetê psîkolojîkî ra ma rehet nîyê’ waştişê înan o bi ke dês bêro rijnayene. Seba nê waştişê şarê xo ma o dês rijna. Ganî şar azad bo. Wa şarê ma rê pîroz bo.”

Hetê bînî ra barîyerê vernîya Şaredarîya Gird a Mêrdînî de zî danê şodirî ra nata yenê wedaritene.