Rayberîya Başûrî derheqê komkiştişê teyareyanê şerî yê dewleta Tirkî yê Gonîşe û Kortekê de eşkerayîye daye.  Eşkerayîye de vatişêk vera dewleta Tirkî nêame kerdene labelê nê komkiştişî ra reyna PKK berpirsîyar ame dîyayene.

Eşkerayîya derheqê komkiştişî de tu rexneyêk zî dewleta Tirkî rê nêame kerdene labelê PKK ame sucdarkerdene. Eşkerayîye de ame vatene, Hukmatê Herême yê Kurdistanî, “Semedê bombardûmananê serê herêmanê sînorî yê ke bîyê sebebê merdişê hemwelatijanê sîvîlan xeylî xemgîn û bifikar o. No semed ra ma serweşîye danê keye û merdimanê kesanê cuya xo vîndî kerda. Seba ke endamê PKK’yî bi hawayêkê bêperwayî şinê mîyanê dewan û cayanê ciwiyayîşî, serê cuya hemwelatijanê ma yê herême de rîsk virazenê û hetê bînî ra no virnîya hemwelatijan birneno ke agêrayê welatê xo.”

Dewam eşkerayîye de ame vatene, “Hukmatê Herême yê Kurdistanî do destûr nêdano ke sînor vera asayîşê welatanê cîranan sey unsûrê tehdîtî bêro bikarardene. Çunke rîyê nê hêrişan ra hemwelatijê ma zirar vînenê. Ganî wareyê ciwîyayîşî nêbê wareyê bombardûman û şerî. Hetê bînî ra PKK’ijî zî ganî dewan ra dûrî vindê û cuya sîvîlan nêkerê mîyanê xeterî. Hukmatê Herême yê Kurdistanî, derheqê bombardûman ê ke rojanê veranan de ameyê viraştene de fikarê xo resnayê Tirkîya, ame dazanayene ke na rewşe nêra dubarekerdene.”