Perîhan Akane bi nameyê xo yê mîyanê Têgêrayîşê Azadîye yê Kurdan Robîn Mîdyate, 24'ê Adara 1990 de qezaya Mîdyatî ya Mêrdînî de ameye dinya. Robîn Mîdyate 3 wayî û 4 birayan reyde bîye pîle. Beşê Sporî yê Unîversîteya Dîcleyî qedêna û bîye sporvanêka profesyonele. Nîsana 2013 de qerar da ke tewrê refê gerîlanyan biba û Mêrdîn de tewrê refê gerîlayan bîye.

Maratonê kilm ê cuya xo de Behdînan, Zagrosan, Avaşîn, Cîlo, Çarçella û Botanî bi leze vaz dana. Robîn Mîdyat a ke vazdayoxanê ciwanan ê şorişî ra yewe bîye, Behdînan ra dima verê xo da Gabarî, bi israr waşt ke şora Mêrdin û uca de dest bi gerîlayîye bikera. Teşrîna peyêna 2017 de çolê qezaya Şemrexî yê Mêrdînî de teba Rûbar Qoser, Vîyan Gape, Xemgîn Sîyabend, Destan Amed û Agît Amedî şehîd bena.

Robîn Mîdyate vernîya raywanîya xo ya ver bi Mêrdînî qalê xo û prosesê tewrbîyayîşê xo yê mîyanê PKK’yî kerd: “Serra 1990 ra nata ma PKK nas kerdêne. Serra 1993 de kêna apê mi tewrê mîyanê refê PKK’yî bibî. Gerîlayan bala ma zî ante.

Bi tewrbîyayîş merdimî eşkeno biciwîyo

Her çiqas ez tayê ereyî tewrê mîyanê refê gerîlayan bîya zî, mi vatêne ez partîye nas kena, labelê tewrbîyayîş û dîyayîşê aye tayê cîya bi. Rindekîya xozayî û xozayî reyde yewbîyayîşê gerîlayan, teyna bi tewrbîyayîşî merdim eşkeno bivîno û biciwîyo. Merdim dimayo ke tewrê ci bi, bi hawayêkê xorîntirî giranîye dano serê xozayî, gerîlayan û hevalîye.

Bi felsefeya Rayberîye hemrayîye

Koyan reyde hemrayîye bi felsefeya Rayberîye yena kerdene, zaf hîsê cîyayî vejîyenê werte. Taybetmendîyê xirabê ke ma sîstemê camêrdîye ra girewtê, encax bi na felsefe eşkena mîyan ra wedarîyo. Cuya PKK’yî û koyan, cuyêka xeylî rindeka ke merdim nêeşkeno xeleyalanê xo de bivîno, pêşkêşê ci kena.

Zaf wazena şora Mêrdîn

Waştiş û hesreta her gerîlayî şîyayîşê Vakurê Kurdistanî yo. Çarçewaya Pawitişanê Îmraliyî yê Rayberê Şarê Kurdî Abdullah Ocalanî de, serê bingeyê pawitişê meşrû û pawitişê cewherîyî de ma bî wayîrê hişê têkoşînê îdeolojîkî. Mi serê pawitişê cewherîyî de perwerdeyo îdelojîk dî. Mi waşt şora Mêrdin, labelê herêma Gabarî de ameya wezîfedarkerdene. Ez zerrî û can ra wazena şora bi Mêrdîn.

Ca û wareyê fermandar Egîdî

Gabar seba ma zaf muhîm û cîya yo. Ca û wareyê fermandar Egîdî yo. Wexto ke nameyê herêma Gabarî yeno ziwanî ser, hîsê cîyayî ruhê merdimî de peyda benê. Zerrîya merdimî bena germine. Ez bi kelecan û keyfweş a.

Seba binkerdişê hêrişanê hêzanê îşxalkeranê Tirkî û seba pawitişê şarê xo ma kewtê bi rayîr. Amancê şîyayîşê min ê Vakurê Kurdistanî o yo ke, ez prosesî rê biba cewab. Bi tewrbîyayîşêkê xurtêrî ez do cehd bikera naye biveja werte.”