Dewleta tirke ya îşxalkere 14ê nîsane ra nata vera Zap, Avaşîn û Metîna hêrişanê îşxalî rê dewam kena û sûcanê xo yê şerî zî zêdînena.

Merkezê Îrtîbatî û Çapemenîye yê HPGyî eşkerayîya bîlançoya şerê 5 mengan de dabi zanayene ke artêşa îşxalkere çek û gazê kîmyewîyî vera gerîlayan şuxilnena. HPGyî vatbi: ''2004 reyî tunelî şerî û çeperê hêzanê ma pê bombayanê qedexekerdeyan û çekanê kîmyewîyan dîyayî bombayan ver.''

Derheqê sûcanê şerî de dîmenê neweyî vejîyayî werte. Dîmenan de aseno ke artêşa îşxalkere Warê Şehîd Pîrdoganî yê Warê Xoverdayîşî yê Girê Amedîyê yê Metîna de vera gerîlayan bombayanê qedexekerdeyan û çekanê kîmyewîyan şuxilnena.

Goreyê agahîyanê ke çimeyanê gerîlayan ra ameyê girewtene, nê bombayê qedexekerdeyî çend madeyan ra yenê pê, komplîke yê û seba ke sey bombaya nuklere ya taktîkî tesîr bikerê debok û bermîlan yenê dekerdene.

Dîmenan de aseno ke nê bombayî verfekê tunelanê şerî de şuxilîyenê.

11-12ê tebaxe, 16-17ê tebaxe û 24ê tebaxe ra nata zî artêşa îşxalkere bombayanê winasênan vera tunelanê şerî xebitna û kerd ke pê gazê jehrînî tunelan de gerîlayan bixeniqna.

Artêşa îşxalkere de pê xoverdayîşê gerîlayan nêeşkaye 27ê tebaxe ra nata zî hêzê PDKyî seba serkewtişê ci Amedîyê de rayîr û çeperan virazenê.