Bi Qerarnameyê Serekkomarîya Tirkîya bire ameye dayene ke taxa Kaynartepeyî ya qezaya Rezanî ya Amedî de erazîyê bi 53 doniman sey erazîyê birîskî ame îlankerdene û tede vurîyayîşî bêrê kerdene. No ca cayo tewr qedîm ê qezaya Rezanî yo.Qeza de bi hezaran roniştoxê herême estê, gama 1. a vurîyayîşî de 337 bîna û 354 keyeyî estê 

Hemserekê HDPyî yê Amedî Zeyat Ceylanî derheqê vurîyayîşî de qisey kerd.

Ceylanî ard ziwan ke bi nê projeyê vurîyayîşê şaristankî yeno waştene ke verê rantî abibo û vat: ''Rezan de  verê hesab û kerdişanê gemarinan bi nê projeyî ame akerdene. Hukmat terefgîran û dormeyê xo rê çimeyanê zengînîye aferneno. Derheqê projeyî de fikrê şar, dezgeh û rêzistinanê komelkîyan zî nêame girewtene. Eke dkan û keyeyî bêrê rijîyayene nê roniştoxî do şorê kamca? Derheqê naye de zî zanayîşêk nêdîya ma. Têna bilboardan de nusîyeno ke ê do keyeyanê neweyan virazê. ''

Ceylanî pare kerd ke bi nê hawayî hukmat demografîya herême zî vurneno û vat: ''Ê wazenê Rêzan de kesê xerîbî cabibê. Ma do qet destûr nêdê ke demografîya herême wa bêra vurnayene. Eke armancê înan kêmînayîşê rayanê HDPyî yo do teqez ser nêkewê. Ma Sûr, Nisêbîn, Gever û Sûr de dî ke şar qet îradeyê xo ra fek vera nêdo.

Nika înan Sûr xo rê kerd propaganda. Vanê ê do Rêzan zî bikerê sey Sûr. La xora vurnayîşê Sûrî zaf xirabin bi. Ma do sey HDP na mesele û proje teqîb bikerê. Qeyûman ra nata Rezan de hesabê rantî rojdem de yê. Ma Sûr de dî ke dewlete senî bînaya ma yê tarîxîyî rijnayî. Ma do pêro zûranê înan teşhîr bikerê. MA sey HDP Rezan de derheqê projeyî de zanayîşî dayî şarî. Şar nêzaneno do çita bêro sereyê ci. Ma tim hetê şarî de yê û ma do şar agahdar bikerê.''