Wan de bi germbîyayîşê hewayî ribeso ke koyanê berzan ra yeno arêdayene dezgeyan de cayê xo girewt. Ribes yan zî bi nameyê xo yê bînî mûzê newalan o ke yeno bawerkerdene nêweşîyanê sey kanser, zeriko, şekir, tansiyon û problemanê made û roqerayan rê rind o û şertanê zehmetan de yeno arêdayene desteya ci 10, kiloya ci zî 20 TL ra yeno rotene.

Ribeso ke koyanê berzan ê herême ra yeno arêdayene û kuçeyanê şaristanî de roşîyeno seba xeylî kesan beno ameyeyêko îlawe. Ribeso ke tirşîya ci zî yena viraştene hîna zaf gama ke teze yo werîyeno. Ribeso ke tayê sole û tayê zî şekir kenê piro û wenê, tena menganê wisarî de yeno dîyene. Ahmet Başo ke her serre nê wextan de Ribesî roşeno, vat ke ê koyan ra rojane bi tewreyan ribesî arê danê. Başî vat, “Wisar ame, ribes vejîya. Ribes newe vejîya, no 3 rojî yo. Hetê şarî ra zaf yeno heskerdene, naye ra zaf taleb esto.”