Roniştoxê Kampa Şehîde Nazê ya Şingalî ke bêdê hêrişê çeteyanê DAÎŞî yê 3ê tebexe ra nata hema xeyman de manenê, vanê înan 7 serrî yo zaf tengayîye ante la rixmê nayî herra xo de rehet ê.

Faris Şingalîyî vat: ''Ma mecbur mendî ke badê fermanê peyênî şirê Şêladizê. Ma do çirey holeya ke şarê Şêadizê ma rê kerde xo vîr a mekerê. Înan ma rê zaf hetkarîye kerde. La na herra pîrike û pîrkalanê ma ya coka ma agêrayê erdê xo.  Seba ke banê ma ameyî vêşnayene û rijnayene ma mecbur mende ke xeyman de biciwîyê. Senî ke şima zî vînenê ma binê zordarîya pîle de ciwîyenê. Heta ewro hukmatê Başûrî ma rê çîyêk nêkerd. Vanê ma şima pawenê, şima rê hetkarîye kenê û halê ma werte de yo. Mîyanê ma de domanî û extîyarî estê. Tîya hamman zî zimistan zî zaf çetin ravêreno. Gereka şarî rê hetkarîye bikerê. La ê têna wazenê şarê Şingalî bigerê binê kontrolî. Destûr nêdanê ke şar bihuzur tîya biciwîyo.  Semedê ma cuyeya bihuzere  cuyeya xoser û biasayîşe ya.''

Salîh Bedelî zî nê wina qisey kerd: ''7 Serrî yo ma zaf tengayîye ante. Ge ge dezgehê komelê sîvîlî yenê nameyê ma nusenê la heta ewro bê xeyman hetkarîyêke nêrasaye ma. Nê dezgehî pêro têna qale de estê. Rixmê heme zehmetîye seba ke ma erde xo de pîya bi şarê xo yê sereyê ma berz o. Ma tîya ra veng danê heme şarê xo ke kampan de manenê wa hînî agêrê herra xo. Bêîmkanîye ma zafê la ma tîya çi bikerê ma xo rê kenê. Rewşa înan ûca ma ra xirabêr a. Herra xora dûr ê û binê zextê de yê. La ma tîya pê îradeyê xo cayê domananê xo de manenê.''

Reşo Kutu yo ke îdareyê xo bi heywankarîye keno bale ante tengayîya ke ancene ser û vat: ''Ma nêeşkenê hewceyanê xo yê esasîyan bîyarê ca. Gereka hukmatê Iraqî berpirsîyarîya xo bîyaro ca. Şertî senî benê wa bibê ma do herra xora mevejîyê.''