Bi germbîyayîşê eyamî citkarê ke çîyan karenê, emser seba ke fîyetê toximî xeylî bîyo zêde do nêkarê.

Citkarê ke Wan de yê emser çîyêk nêkarenê. Wan de ke tede her tewir mêwe û sebze yeno ramitene, emser citkarî çîyêk nêkarê. Mêwe û sebzeye ke ameyêne karitene îhtîyacîya şarê Wanî bi ca ardêne û bajar û qezayanê Wanî de ameyêne rotene.

Verî 2 Lîra Bi Nika Bîyo 40 Lîra

Rîyê vaybîyayîşî ra xeylî kesî sektorî ra remenê. Krîzê ekonomî yo pîl tesîrêko negatif serê zîretî de kerd. Par toximê pîyazan 2 lîra bi la emser bîyo 40 lîra. Seba ke Wan de no toxim zaf vay o, çewî emser piyaz nêkarit.

Citkaro bi nameyê Hakan Aydinî yo ke Wan de citkarîye keno vat, “Mumkun nêyo ke merdim bi nê fîyetî toximî biherîno. Rîyê nê fîyetanê berzan ra ez do emser pîyazan nênî ro.”