Îran de 19’ê Adare dimayê varayîşê zêdeyî ra laser werişt û bi sebenê felaketê xozaye. Mîyanê çend rojan de heme eyaletan de felaketê laserî qewemîyaye. Roja peyêne de, bi taybetî temamê Rojakewtena Kurdistanî de rîyê varanê zêdeyî ra laser werişt. Herêma ke laserî tewr zêde zerar verdayo ci Îlam o.

620 dewan de awa şimitişî çin a

Îlam de xeylî kesê bêçare mendî ke wareyan de, binê şilîye de, bê awe û nan, bê cil û kolan debara xo kenê. Goreyê zanayîşanê ke herême ra yenê, 620 dewan de, 150 hezar kes bê awe pak a şimitişî mendê. Selahîyetdaran da zanayen ke Serbajarê Lorîstanê Xurremabad zî tede 120 dewî bê awa pake mendê. Îlam de netîceyê weriştişê laserî de xeylî ca û cangî binê laserî de mendî û zerarêkê giranî dî. Na rewşa tewr zêde zerar da bajarê Pol Doxtarî.

250 dewan de wareyê têgêrayîşî nêmend

Goreyê  şaredarê Pol Doxtarî, 250 dewanê dorê Nurabadî  de wareyê têgêrayîş nêmend. Goreyê Ajansê Xeberan ê Farsî, endamê parlamentoyê Îranî Hamîdreza Kazemî, da zanayene ke herêma Pol Doxtarî de xeylî kesî şewe teber de, serê koyan ê berzan de derbaz kenê. Kazemî vengdayîş bi hukmat û sazgehanê mîyanneteweyî kerd ke seba xita û kinc û kolan hetkarîya înan bikerê.

Nêmeyê di bajaran û bi desan dewî binê awe de mendî

Kazemî, ard ziwan ke Lorîstan de 60 dewî binê awe de mendî û têkilîya înan a  bi dinya qut bîya. Bajarê  Pol Doxdarî û Mamûlanî teba 20 dewî bînî  binê awe de yê. Parlamenterê Tehranî Mahmud Sadegî, peyamê xo yê ke Twetterî  ser o seba serekkomar Hesen Rûhanî pare kerdo de, seba şert û mercanê Loristanî de vat, “Verbi felaketî de yo.”

Sadegî: Lorîstan verbi felaketî de yo

Sadegî wina nuşt; “Birêz Rûhanî!Loristan ver bi felaketî de yo. Pol Doxtar binê çamûre de mend. Hewcadarîye şarî, sere de awe, xida û derman nêameyî pêşwazîkerdene. Vilakerdîyîye û kêmasîya plansazîye sewîyeya tewr corî de ya. Seba rêxistinkerdişê na rewşe,  rayberîya sewîyeya mîyanneteweyîye de û butçeyêko muhîm hewca yo. Na rewşe, bi hetkarîya sewîyeya eyaletan de nêna îdarekerdene.” Temsîlkarê parlamentoyî yê Pol Doxtarî  eşkerayîya ke 4’ê Nîsane de da ajanse Farsî de da zanayene ke xeylî mexdûrê laserî nê di rojî yê ke mîyanê hêgayan de ciwîyenê.

Yeno vatene ke bi seyan kesî merdî

Çimeyê herême yê Lorîstanî da zanayene seba ke helîkopterî erey ameyî herême û bê hetkarîye keyeyî di rojî serê bananê xo de mendê û coka zî bi seyan kesî laserî de şîyî û cuya xo vîndî kerda. Çapemenîya fermî zî eşkera kerd ke temamê Îranî de 66 kes rîyê felaketî ra cuya xo vîndî kerda.