Fermandaranê HPG’yî ra Rohat Amedî bi wesîleya menga Gulane ke hetê PKK’yî ra sey ‘Menga Şehîdan’ yena namekerdene, ajansê ma rê qisey kerd. Amedî vat, “Hem têgêrayîşê PKK’yî, hem zî têgêrayîşê çepî yê şorişgêrî yê Tirkîya menga Gulane de xoverdayîşêko xurt kerd û şehîdê pîlî dayî.”

Amedî şoreşgirê Tirkiyayijî Îbrahîm Kaypakkaya, Denîz Gezmîş, Yûsûf Aslan û Huseyîn Înan, kadroyê serkêşî yê PKK'yî Hakî Karer, Mehmet Karasûngûr, Îbrahîm Bîlgîn, Halîl Çavgûn, xoverdayoxê zîndanê Amedî Ferhat Kûrtay, Eşref Anyik, Necmî Oner û Mahmût Zengîn ê ke menga Gulane de şehîd bîbî, bi vîr ardî. Amedî heman wextî de Ferzat Kemanger, Şîrîn Elemhûlî, Xemîn Bekes û Alî Haydaryan ê ke 10’ê Gulane de şehîd bîbî zî bi vîr ardî û vat ke seba nê heme şehîdan menga Gulane seba înan yena manaya berzkerdişê xoverdayîşî û xurtkerdişê mucadeleyî.

‘Ma do Wezîfeyê Xo Bica Bîyarê’

Fermandaranê HPG’yî ra Rohat Amedî vat seba azadîya Ocalanî û şarê Kurdî ê prosesêkê muhîmî de yê û vat, “Serê bingeyê awankerdişê Kurdistanekê azad û xoserî de xoverdayîş û mucadeleyêko pîl esto. Bi serkêşîya Leyla Guvene zîndanan de, her wareyê Kurdistan û Ewropa de bi tewrbîyayîşê bi hezaran embazanê ma xoverdayîşê grevê vêşanîye dewam keno. Bi heman hawayî 15 embazanê ma qerarê rojeyê mergî da. Rojeyê mergî seba ma fermanê berzkerdişê xoverdayîşî û pîlkerdişê mucadeleyî yo. Menga Gulane xora fermanê xoverdayîşî dana, ma do zî na çarçewaye de tê bigêrê, wezîfeyo ke keweno milê ma ser bica bîyarê.”

Amedî vat, “Wa hukmatê AKP-MHP’yî yo faşist bizano, heta ko de yew ciwanê Kurdan tena zî bimano, do nêeşko bireso amacê xo. Nê bingeyî ser o ma reyna soz danê şehîdanê xo yê şorişgêran û vanê ke ma do tim vîrameyîşanê înan rê wayîr vejîyê û dimayê hewn û xeyalanê înan şirê. Seba bicaameyîşê xeyalanê înan çi bikewo milê ma ser ma do bikerê.”