Endama Konseya Rayberdişî ya KCKyî Elîfe Ronahî Medya Haber TVyî rê derheqê çalakîyanê 8ê Adare, têkilîya Newroze û PKKyî de qiset kerd.

Qiseykerdişê Ronahî ra beşêk wina yo:

''Çalakîyê 8ê Adare emser dîyarîya azadîya Rayberîye ameyî kerdene û bi coşî ameyî caardene. 2021-2022 ra nata waştişê cinîyan tay vurîyayî. Cinîyî hînî rêxistinîya xo hîna bi tûjî vejenê werte. Çalakîyê 8ê Adare zî ney îsbat kenê. Têkoşînê cinîyan ê kurdan zî hişmendîyêka girînge vete werte. No zî vera tesîrê dinya keno. Girîng o ke cinîyê kurdî rêxistinbîyaye yê, dezgehê înan estê û xopawitişî anê ca. Nê 8ê Adare de waştişî bi zelalî ameyî vatene û hedefê têkoşînî ameyî dîyarkerdene.

Newroze pê PKKyî agêraye kokê xo ser, resaye a raştîye ke newe ra bîyayîşî îfade kena. Mazlûm Doganî Newroze de vera teslîmîyet, îxanet û înkarî reddîye kerde. Coka Mazlûm Dogan Newroz o, ruhê PKKyî yo.Zekîye zî no ruh teqîb kerd. Aye zî Sûran de meşaleyê bedenê xo darde kerd. Rehşane zî Îzmîr de mojna ke Newroze nêna astengkerdene. Ewropa de Bêrîvane û Ronahî zî çalakîye kerde. Ez nê embazan nêzdî ra şinasnena. Nê wird eembazan bi çalakîya xo mesaj da dewletanê Ewropa û kurdanê dîaspora. Çalakîya Sema Yuce zî pê çalakîya xo îdeolojîya azadîya cinîyan selam kerde. Nê şehîdanê Newroze ruhêko newe, terzêkê xoverdayîşî û tewrê redkerdişî mojna. No ruhê PKKyî yo. No ruhê cinîyan ê kurdan o ke adirê Newroze de xo bi xo aferna.

Newroza 1973î de rayraşîyayîşê tarîxî dest pêkerd û nê 50 serran de tecrubeyê girîngî vejîyayî werte. Rayberîye verê Newroze akerd. Ey ma berdî koyanê Kurdîstanî û adirê azadîye mojna ma. Ey hişmendîya neteweya demokratîke daye ma ke na netewe neteperwerî, dînperestî û cînsîperestîye qebul nêkena.

PKK de cinîyî kerdoxê esasî yê. Cinîyî serkêşê şorişê hişmendî û têkoşînî yê. Xora Rayberîye ma no wina kerd. 3 nakokîyê komelkî û tarîxkî est ê; erjê merdimîye destê tay hegemonan de yê, hêzê hegemınîkî xoza talan kenê û serdestîya camêrdan de mesafeya mabênê camêrd û cinîyan. Nê hîrê rewşan tay nakokîyî awan kerdî. Paradîgmaya Rayberîya ma nê nakokîyan wedarnana. Cinîyê kurdî xêrê nê têkoşînî ra resayî na aste.

Ma verî 1987 de rêxistinîya xo ya xosere viraşte. Partîbîyayîş, artêşbîyayîş, sîstemê konfederalê demokratîkî yê cinîyan na rêxistinîye teqîb kerde. Coka şorişêko pîl ame kerdene. Cinîyê kurdê ke çin hesibîyayêne ewro her cayê cuye de yê, serkêş ê. No çîyo qij nîyo. Xora ma deyndarê Rayberîye yê. Têkoşînê azadîye do dewam bikero.''