Roniştişê dewaya keyeyê Şenyaşarî dest pêkerd

Roniştişê dewaya keyeyê Şenyaşaro ke 3 endamê ci hetê pawitox û merdimanê Wekîlê AKPyî Îbrahîm Halîl Yildizî ra kişîyayî, dest pêkerd.

Serra 2018î de qezaya Pirsûsî ya Riha de pawitox û merdimanê Wekîlê AKPyî Îbrahîm Halîl Yildizî  hêrişê keyeyê Şenyaşarî kerd û hêrişî de 4 kesan dinyaya xo bedilnaye. Nê 4 kesan ra 3 kesî keyeyê Şenyaşarî ra bîyî. Roniştişê 4. yê dewa  Mehkemeya Cezaya Girane ya 3. ya Meletî de dest pêkerd.

Roniştişî ra verî dormeyê edlîye ame girewtene. Emîne Şenyaşara ke hêriş de di laj û mêrdeyê ci kişîyayî û tay endamê keyeyî tewrê mehkeme bîyî. Avûkatê Komeleya Huqûqnasan a Seba Azadîye (OHD) yê Riha û Dîlokî zî tewrê roniştişî bîyî. Keyeyê Yildizî ra zî tay kes û avûkatî tewrê mehkeme bîyî.

Wekîlanê HDPyî Nurane Îmîr, Hîşyar Ozsoy û wekîlê verênî Behçet Yildirim zî waşt ke dekewê salona roniştişî la destûr nêdîya înan.

Fadil Şenyaşaro ke ser birîndarî hêrişî ra xelisîya û dima zî tepişîya, Zîndanê Xarpêrî ra, Enver Yildiz zî Zîndanê Osmanîye ra bi rayîrê telekonferansî tewrê roniştişî bîyî.