Dewa Çemêkurkî ya qezaya Rûbarokî ya Colemêrgî de ciwanê ke seba pîknîkî şîbî dewe leşkeranê tirkan guleyî eştî înan ser. Netîceya guleyanê leşkeran de ciwanê bi nameyê Reşît Ekîncîyî sereyê ci ra birîndar bi.

Goreyê zanayîşanê şahîdan vizêr nêmroje komêka ciwanan seba pîknîkî şîye Girê Ceilkanî yê Çemêkurkî.

Qereqoloke nêzdîyê herême bi, venga ciwanan da û tay ciwanî şîyî hetê leşkeran. Ciwanan leşkeran rê vat ke ê seba pîknîkî ameyî la leşkeran waşt ke ciwanî wa şorê. Dima  ke ciwanan îfade kerd ke ê do nêşorê leşkeran guleyî eştî ciwanan ser û Ekîncî sereyê ci ra birîndar kerd.

Wekîlê Colemêrgî Saît Dedeyî mesele twitter de pare kerde û wina nuşt: ''Ez nê wehşeto ke Rûbarok de bi hawayêkê sîstemarîkî şarî rê yeno kerdene şermezar kenê. Selahîyetdarî wa cade derheqê babete de eşkerayîyêke bidê.''