Endamê Konseya Rayberdişî ya KCKyî Sabrî Okî programêkê taybetî yê Stêrk TVyî de rojdem erjna. Sabrî Okî derheqê pêvînayîşanê peyênan Îmraliyî de nê vatî:

''Çend rojî verî Omer Çelikî vat bazarîye çîn a, muzakere, tewîz çîn o. PKK wa çeke rono. Bingeyê nê vatişan de redkerdişê estbîyayîş û heqanê kurdan, înkar est o. Tarîx de nê zîhnîyetî vera şarê kurdî polîtîkayê asîmîlasyon, qirkerdişî ardî ca. Omer Çelik zî AKP zî zaf hol zano ke meseleya tewr giran a Tirkîya meseleya kurdan a. Nê zîhnîyetê qirkerî yê vera kurdan Tirkîya rê da vînîkerdene. Seba ke meseleya kurdan nêameye çareserkerdene dewleta tirke ewro zî hem zere de hem zî teber de mîyanê krîzanê giranan de ya. Eke eynî zîhnîyetê înkarî rê dewam bikerê netîce zî do seycîye bo. Bêşik no tehlukeyin o.

Rayber Apo vera nê zîhnîyetî tim waşt ke meseleya kurdan bi rayîrê sîyasî, demokratîk û muzakereyî çareser bikero. Ozalî waşt na mesele bi giranî bigîro dest la xora ma pêro zanê çi ame sereyê ey. O wext Birêz Talabanî bibi mîyançî, Rayber Apoyî waştêne prosesî aver bêro. O prosesî ra dima şero ke gird û bêehlaq ame rayraberdene. PKK her hetî ra bi ruhê girdî û fedayîyî xover da, ewro hema zî xover dano. Tewr peynî de 2013 de Rayber Apoyî reyna waşt zemînêkê çareserîye yo sîyasî, huqûqî pê bîyaro. Dewleta tirke û AKP tewrê ci bîyî. O wext Rayber Apoyî bale ante nuqtayanê muhîman ser. Rayber Apoyî o wext heyetî ra vatbi eke zemînê sîyasî û huqûqî yê nê prosesî nêro pêardene beno ke şima bierzê zîndanî. Wina zî bi.

Ewro ma vînenî eynî çî benê. Omer Çelik vano pazarîye çîn a, muzakere çîn o.Têna vanê wa Rayber Apo semedê ronayîşê çekan veng bido. Rayber Apoyî 2013 de zî va, ewro zî vano; eke azad mebo, tecrîd medarîyo we, şertî mebedilîyê o wext gamêke nêeşkena bêra eştene. Eke dewleta tirke û AKP wazenê çîyêk bikerî ganî verê bi hewayêkê giranî têbigêrê. Rayber Apo qiseykerdişê xo yê peyênî de vano o wazeno verê Tirkîya abikero.Tewiro ke AKP mojneno rayîro biaqil nîyo, xîzmetê çareserîye nêkeno. AKP ganî her çî ra ver giran bo, tecrîd ganî bêro wedaritene. Seba ke Rayber Apo rolê xo bîyaro ca ganî bieşko rehet têbigêro. AKP heta nika nîşananê nêgatîfan ramojneno. Qeyûm, destbendkerdiş, hêrişê vera Rojawanî dewam kenê la heta bînî ra wazenê wa proses aver şiro. Eke AKP sey 2013yî nêzî bibo dewleta tirke do gamêke zî aver nêşiro. Ma sey têgêrayîş û şarê kurdî pabesteyê Rayber Apoyî yê, ewro ra tepîya zî do wina bo. Ganî şarê ma û dostê ma têkoşînî xurtêr bikerê. Her çî pabesteyê têkoşînî yo.''